Neymar hló að Ronaldo

Al Nassr tapaði fyrir Al Hilal í vítaspyrnukeppni, 5-4, í úrslitaleik konungsbikarins á föstudaginn.

Ronaldo var með böggum hildar eftir leikinn enda þýddi tapið að hann vinnur engan titil á þessu tímabili.

Stuðningsmenn Al Hilal skemmtu sér hins vegar konunglega yfir óförum Ronaldos og kölluðu nafn Lionels Messi í sífellu, eins og áhorfendur andstæðinga Al Nassr gera jafnan á leikjum.

Neymar er leikmaður Al Hilal en glímir við meiðsli og sat uppi í stúku þegar samherjar hans tryggðu sér titilinn á föstudaginn. Hann hafði greinilega gaman að háðsglósum stuðningsmanna Al Hilal í garð Ronaldos og sást hlæja þegar nafn Messis var kallað.

Neymar sleit krossband í hné í leik með brasilíska landsliðinu í október og hefur verið frá keppni síðan þá. Hann náði aðeins að leika þrjá leiki með Al Hilal áður en hann meiddist.

Ronaldo skoraði ekki í úrslitaleiknum á föstudaginn en nýtti sína spyrnu í vítakeppninni. Yassine Bounou, markvörður Al Hilal, var hetja sinna manna því hann varði tvær síðustu spyrnur leikmanna Al Nassr.

Auk þess að vinna konungsbikarinn vann Al Hilal sádiarabísku úrvalsdeildina.