Dýrið hans Schumachers drapst úr hræðslu

Þessi fyrrum formúluökumaður og yngri bróðir Michael Schumacher tók við fjölskyldubúgarðinum af foreldrum þeirra. Búgarðurinn er í þýsku borginni Kerpen og er Ralf með fullt af dýrum á honum.

Hann heldur því fram að flugeldasýning hjá rafveitufyrirtæki í fimm kílómetra fjarlægð hafi orðið til þess að dádýrið hans drapst úr hræðslu.

„Ég vona að þeir sem skutu upp þessum flugeldum séu stoltir af sjálfum sér,“ skrifaði Ralf Schumacher á Instagram.

„Ég óska starfsfólki rafveitufyrirtækisins gleðilegs nýs árs. Ég vil þakka ykkur sérstaklega fyrir þennan flugeld sem endaði á minni lóð og drap eitt dýranna minna. Ekki má heldur gleyma ofsahræðunni sem flugeldarnir kölluðu fram hjá hestunum, svínunum og hinum dýrunum hér,“ skrifaði Schumacher.

Schumacher, sem tók við fjölskyldubúinu af foreldrunum, sagði í viðtali við Bild fyrir nokkru að hann stefndi að því að stofna þar dýragarð.

„Við höfum alltaf verið með fullt af dýrum í okkar fjölskyldu. Við ólumst upp í kringum dýr og auðvitað hafði það mikil áhrif á mig,“ sagði Schumacher í viðtali við Bild.

Michael Schumacher var líka mikill dýravinur og gaf meðal annars einu sinni eiginkonu sinni hestabúgarð í Sviss í afmælisgjöf. Þau keyptu seinna saman búgarð í Bandaríkjunum.

Michael varð sjö sinnum heimsmeistari í Formúlu 1 en þeir bræður eru þeir einu sem hafa báðir unnið formúlukappakstur. Ralf komst hæst í fjórða sæti í heimsmeistarakeppni ökumanna en því náði hann bæði 2001 og 2002. Eldri bróðir hans varð heimsmeistari bæði þessi tímabil.