Verðlaunaplötur úr ýmsum áttum

Samúel Karl Ólason skrifar 15. desember 2023 11:29

Kraumsverðlaunin voru afhent á Kex í gærkvöldi og í sextánda sinn. Að þessu sinni voru það þau Apex Anima, Elín Hall, Eva808, Neonme, Spacestation og ex.girls sem hlutu verðlaunin, sem veit eru fyrir þær hljómplötur sem þykja skara fram úr á Íslandi.

Í tilkynningu segir að verðlaunaplötur ársins komi úr ýmsum áttum og spanni meðal annars þjóðlagaskotna popptónlist, drífandi teknó og gítargrúvað rokk.

Sjá einnig: Margir nýliðar tilnefndir til Kraumsverðlauna

Eva808 (Eva Jóhannsdóttir) er að hljóta sín önnur Kraumsverðlaun, en hún fékk verðlaunin fyrst árið 2020 fyrir sína fyrstu breiðskífu; Saultry Venom.

Fram að þessu hafa sex aðrir listamenn og hljómsveitir hlotið Kraumverðlaunin í tvígang; Retro Stefson (Montaña, 2008 og Retro Stefson, 2012), Mammút (Karkari, 2008 og Komdu til mín svarta systir, 2013), Hjaltalín (Terminal, 2009 og Enter 4, 2012), Dj flugvél og geimskip (Glamúr í geimnum, 2013 og Nótt á hafsbotni, 2015), Kælan Mikla (Kælan mikla, 2016 og Nótt eftir nótt, 2018) og Gugusar (listen to this Twice, 2020 og 12:48, 2022).

Kraumsverðlaunin eru árleg plötuverðlaun Auroru velgerðarsjóðs og er þeim ætlað að kynna og styðja við plötuútgáfu íslenskra listamanna og hljómsveita. Þau voru fyrst veitt árið 2008.

Meðal Kraumsverðlaunhafa fyrri ára má nefna: Auður, ADHD, Agent Fresco, Amiina, Anna Þorvaldsdóttir, Anna Guðný Guðmundsdóttir, Ásgeir, Between Mountains, Bjarki, BSÍ, Cell7, Daníel Bjarnason, FM Belfast, GDRN, GKR, Grísalappalísa, gugusar, Gunnar Andreas Kristinsson, Gyða Valtýsdóttir, Hafdís Bjarnadóttir, Helgi Hrafn Jónsson, Hildur Guðnadóttir, Hjaltalín, Hugi Guðmundsson, Ísafold kammersveit, JDFR, Kvikindi, Kælan mikla, Lay Low, Mammút, Moses Hightower, Misþyrming, Ojba Rasta, Ólöf Arnalds, Retro Stefson, Samaris, Sin Fang, Skrattar, Sóley, Una Torfa og fjölmargir fleiri.

Kraumsverðlaunin 2023 eru valin af níu manna dómnefnd skipuð fólki með margvíslega reynslu af því að fjalla um, spila og vinna með íslenska tónlist í fjölmiðlum og á öðrum vettvangi.

Dómnefndina skipa; Árni Matthíasson (formaður dómnefndar), Arnar Eggert Thoroddsen, Helga Þórey Jónsdóttir, Lovísa Rut Kristjánsdóttir, María Lilja Þrastardóttir, Óli Dóri, Rósa Birgitta Ísfeld, Trausti Júlíusson og Þorbjörg Roach Gunnarsdóttir.

Kraumsverðlaunahafarnir í ex.girls (áður russian.girls) tóku lagið Hundrað í hættunni í beinni fyrir myndbandaseríu Útvarps 101 og Stúdíó Sýrlands í fyrra. Lagið má finna á plötunni nýju Verk:

Tónlist