Klæðir sig fyrir sjálfa sig og er sama um á­lit annarra

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Það sem mér finnst skemmtilegast við tísku er að maður má klæða sig eins og maður vill. Ó leiðinni ertu líka að tjá þig með þeim fötum sem þú klæðist. Það er svo mikið frelsi þegar maður klæðir sig fyrir sjálfan sig og það er svo skemmtilegt. Hvort sem það er í tísku eða ekki, þá áttu að klæða þig nákvæmlega eins og þú vilt.

Tíska er líka eitt af mínum helstu áhugamálum og mér finnst svo insperandi að sjá hvernig aðrir klæða sig. Ég skoða alltaf nýjustu hönnunarlínurnar á tískuvikum í hinum ýmsu borgum og fylgist vel með vefsíðu Vogue til að skoða myndir frá hátískusýningum hjá mínum uppáhalds fatahönnuðum. Dæmi um þá eru Vetements, Balenciaga, Givenchy, Alexander Vauthier og Off White þegar Virgil Abloh var að hanna fyrir það merki.

Hver er uppáhalds flíkin þín og af hverju?

Úff, það er erfitt að velja uppáhalds flík því ég á rosalega mikið af fötum. Sumt er vintage, sumt er nýtt og annað eru búningar þannig það er erfitt að velja eina flík. En ef ég verð að velja eina flík þá er það hvítur pallíettu kjóll sem ég var einu sinni í á Jólagestum þar sem ég söng lagið hans pabba Vetrarsól. Ég keypti hann á Asos og hef notað hann nokkrum sinnum á tónleikum. Mér finnst þessi kjóll vera með miklar diskó víbrur. Ég er einmitt að syngja á Jólagestum 16. desember í Laugardalshöllinni og það er alltaf skemmtilegt að velja fötin fyrir það. 

Ég elska tískuna á áttunda og níunda áratuginum og á mikið af fötum af nytjamörkuðum sem ég hef verið að safna í gegnum árin. 

Ég bjó í LA í meira en áratug og ég verslaði rosa mikið í nytjabúðum þar sem og á stórum fatamörkuðum og keypti líka mikið af gömlum hátískuflíkum á Ebay.

Eyðirðu miklum tíma í að velja föt hverju sinni?

Nei, ég er rosa ákveðin, veit hvað ég vil og ef ég sé eitthvað sem ég fíla þá kaupi ég það. Ég panta eiginlega allt á netinu og þá er auðvitað ekki hægt að máta en ég hef verið að versla á netinu í svo mörg ár að ég veit nákvæmlega hvort ég passi í fötin sem ég panta.

Ef ég er að versla í búð þá auðvitað máta ég en ég myndi segja ég sé rosa fljót að versla föt. Ef ég fíla fötin þá kaupi ég þau hvort sem þau eru í tísku eða ekki. 

Mér er alveg sama hvað er í tísku og ekki í tísku.

Föt fyrir mér eru svo mikil tjáning um hvernig persóna þú ert.

Hvernig myndirðu lýsa stílnum þínum?

Stílinn minn er frumlegur og villtur. Ég klæði mig fyrir mig, finnst mikilvægt að fötin séu þægileg og svo er stíllinn minn bara svo alls konar eitthvað. Það fer alveg eftir árstíðum hvernig ég klæði mig eða hvernig mér líður. Þannig að stíllinn minn er alltaf að þróast en samt er alltaf mikil tjáning og ákveðin útrás í gangi.

Hefur stíllinn þinn breyst mikið í gegnum tíðina og hvernig þá?

Já, vá. Stíllinn hefur breyst í gegnum árin en samt hef ég alltaf verið rosa mikið fyrir nytjabúðir eins og Spúútnik, þannig að ég hef alltaf verið fyrir föt sem vekja mikla athygli.

Ég get þó staðfest það að ég mun aldrei klæðast buxunum sem eru svo lágar að þegar maður beygir sig niður þá sést bara í bossann á manni. 

Tískan frá 2000-2002 var svo skemmtileg, sumt mjög flott og svo annað alveg hryllilega ljótt.

Meira að segja förðunin frá þeim tíma var agalega ljót, ljósbláir shimmer augnskuggar og rosa mjóar og ofplokkaðar augabrúnir. Margt úr þeirri tísku er þó í tísku núna og það er gaman að sjá það. Mega nostalgía fyrir mig að sjá stelpur í þessari 2000’s era tísku.

Hvaðan sækirðu innblástur í tískunni?

Ég sæki hann alls staðar frá, úr bíómyndum, í götutískuna hjá öðru fólki og tískuljósmyndir frá mismunandi áratugum. 

Svo hef ég alltaf verið með rosa sjálfstæðan fatasmekk og stíl og ég klæði mig alltaf í þau föt sem mér finnst flott. 

Mér er alveg sama ef að einhverjum finnst þau ekki smart. Ég klæði mig fyrir mig og það er svo gaman og mikil gleði í því.

Ertu með einhver boð og bönn þegar það kemur að klæðaburði?

Nei mér finnst bara allt mega í dag varðandi klæðaburð. Mig langar samt að bæta við að það er stundum hjarðhegðun í tískunni og þá eru allir bara í sömu fötunum! Mér finnst að fólk eigi að leyfa sér meira í klæðaburði og stíga út fyrir þægindarammann.

Hver er eftirminnilegasta flík sem þú hefur klæðst og af hverju?

Ég þarf ekki að hugsa mig tvisvar um það outfit. Það var búningurinn minn þegar ég keppti í Eurovision árið 2017 í Kyiv. Vinur minn í LA er þekktur búningahönnuður og við hönnuðum búninginn saman. Ég er algjör vísindaskáldskaps nörd, dýrka sci fi bíómyndir og þætti og mér finnst alltaf fötin í sci fi myndum svo geðveikt flott.

Þannig ég sótti mikinn innblástur úr slíkum bíómyndum þegar við hönnuðum búninginn fyrir keppnina. Svo var búningurinn mjög þægilegur sem skiptir máli þegar þú ert að keppa í svona stórri keppni, því maður er að æfa atriðið svo rosalega oft í búningnum. 

Þannig að hann var sérsaumaður á mig og gert ráð fyrir að ég væri með „in-ear monitora“ í eyrum og svona batterí pakka sem fór ofan í vasa sem var saumaður fastur við beltið á mér. Alls konar svoleiðis smáatriði skipta miklu máli þegar maður er að keppa í Eurovision. 

Það var til dæmis spes rennilás aftan á búningnum sem var liggur við úr stáli svo hann myndi ekki rifna í miðju atriði.

Býrðu yfir einhverju góðu ráði þegar það kemur að tísku?

Mín ráð varðandi tísku er að vera alltaf þú sjálfur og þora að klæða þig í föt sem þér finnst flott. Ekki bara af því þau eru í tísku núna eða þessi og hinn sagði að eitthvað væri ekki flott. Taktu áhættu með þínum klæðaburði, tjáðu þig í gegnum fatastílinn þinn og mundu að hafa gaman af tískunni.

Hér má fylgjast með Svölu á samfélagsmiðlinum Instagram. Hér má hlusta á Svölu á streymisveitunni Spotify en hún var einmitt að gefa út lagið Time.