Barnaþingsmenn gætu vel hugsað sér að setjast á Al­þingi

Barnaþing verður haldið í þriðja sinn í Hörpu á morgun undir handleiðslu Umboðsmanns barna þar sem um 150 fulltrúar barna á aldrinum 11 til 15 ára koma saman. Salvör Nordal umboðsmaður barna segir þetta í fyrsta skipti sem barnaþingsfulltrúar heimsæki Alþingi áður en þau setjist sjálf til þingstarfa á morgun. Vonandi verði slíkt rausnarboð Alþingis að hefð.

„Það er mjög mikilvægt að þau finni tenginguna við Alþingi og við þingmenn. Suma þeirra munu þau hitta á morgun og líka ráðherra,“ segir Salvör. Börnin muni vinna úr tillögum sínum á þinginu á morgun. Fyrri tillögur frá Barnaþingi hafi sumar komist áleiðis og margar fengið umræðu á Alþingi.

Barnaþingsfulltrúarnir skoðuðu þinghúsið hátt og lágt og fengu fræðslu um sögu þess. Til að mynda um þjóðfundinn 1851, fyrir framan stórt málverk af honum, þar sem til umræðu var frumvarp fulltrúa Dana um að Ísland yrði innlimað í Danmörku. Það var á þeim fundi sem Jón Sigurðsson mælti hin fleygu orð „vér mótmælum allir“.

Birgir Ármannsson forseti Alþingis fór yfir störf þingsins og svaraði spurningum barnaþingsfulltrúa, sem voru margar og ekki auðvelt að svara sumum þeirra. Til að mynda hvort hann teldi að það færi að gjósa á Reykjanesi og hver væri munurinn á hægri og vinstri í stjórnmálum.

Baldur Hjörvarsson úr Lágafellsskóla er með ákveðnar skoðanir á því hvað ræða þurfi á Barnaþingi.

Gætir þú hugsað þér eftir þessa heimsókn að verða þingmaður?

„Það gæti hugsast, kannski.“

Hvaða málum myndir þú þá helst berjast fyrir?

„Ábyggilega bara sjálfstæði, ég meinti jafnrétti,“ áréttaði Baldur. Jafnrétti væri mikilvægt mál.

Nína Sól Svavarsdóttir úr Víðistaðaskóla var mjög ánægð með heimsóknina í Alþingishúsið.

Langar þig til að verða þingmaður?

„Já kannski, ég get alveg ímyndað mér það, íhuga það.“

Hvernig finnst þér alþingishúsið eftir að hafa heimsótt það?

„Mér finnst það mjög flott. Ég hef komið hingað áður en salurinn er rosalega flottur. Núna fengum við að koma inn og allt það, þetta er bara geggjað hús,“ sagði Nína Sól sem sat í ráðherrasæti Bjarna Benediktssonar.

Baldvin Sifjarson úr Lágafellsskóla var greinilega hrifinn af því sem hann sá í heimsókninni.

„Já, það er dálítið flott að koma inn í svona gamalt hús sem er svona mikilvægt. Það er talað um svo mikið hérna, margir mikilvægir fundir hérna,“ sagði Baldvin sem var ekki alveg búinn að gera upp við sig hvað hann myndi leggja áherslu á þegar hann sest á Barnaþing á morgun.

Öflugur hópur ungs fólks situr í ráðgjafahópi Barnaþings og þar hafa margir pólitískan metnað eins og París Anna Bergmann úr Menntaskólanum á Akureyri.

„Já mig langar ofboðslega mikið að fá að sitja hérna í framtíðinni og vera alþingismaður eða ráðherra.“

Það er ekkert annað, þú vilt verða ráðherra líka?

„Já, maður fer alla leið. Allt eða ekkert,“ sagði París Anna með slíkri sannfæringu að fréttamaður telur næsta víst að hún verði komin í framboð innan ekki margra ára.