Réttarholtsskóli og Háteigsskóli áfram í úrslit Skrekks

Vésteinn Örn Pétursson skrifar 8. nóvember 2023 23:08

Úr atriði Háteigsskóla, Fjörutíu sekúndur. Anton Bjarni

Réttarholtsskóli og Háteigsskóli komust áfram í Skrekk, hæfileikakeppni grunnskóla Reykjavíkur, í Borgarleikhúsinu í kvöld. Atriði skólanna fjölluðu um sjálfsöryggi annars vegar og sjálfsvígshugsanir hins vegar.

Fólki með sjálfsvígshugsanir er minnt á Hjálparsíma Rauða krossins, 1717, og netspjallið. Þjálfaðir og reynslumiklir sjálfboðaliðar á öllum aldri svara þeim símtölum og spjöllum sem berast. Fullum trúnaði er heitið. Nánari upplýsingar hér. Síminn hjá Pieta-samtökunum er jafnframt opinn allan sólarhringinn og er 552-2218.

Í kvöld fór fram þriðja og síðasta undanúrslitakvöld Skrekks. Á fyrsta undanúrslitakvöldinu á mánudag komust Seljaskóli og Landakotsskóli áfram. Í gær bættust svo Laugalækjarskóli og Hagaskóli í hóp þeirra skóla sem keppa til úrslita næstkomandi mánudag.

Átta grunnskólar tóku þátt í kvöld. Það voru Fellaskóli, Foldaskóli, Háteigsskóli, Hlíðaskóli, Norðlingaskóli, Réttarholtsskóli, Sæmundarskóli og Ölduselsskóli.

Úr atriði Réttarholtsskóla, Í eigin heimi.Anton Bjarni

Sjálfsöryggi og erfiðar hugsanir

Á vef RÚV er fjallað stuttlega um atriðin sem komust áfram í kvöld. Atriði Réttarholtsskóla ber heitið Í eigin heimi og fjallar um það sem gerist innra með ungu fólki, eftir því hvort það fullt sjálfsöryggi eða ekki. Í atriðinu sjást tveir nemendur upplifa svipaðar aðstæður, en takast á við þá á ólíkan hátt eftir því hversu öruggir þeir eru með sjálfa sig.

Atriði Háteigsskóla heitir Fjörutíu sekúndur, en heitið er vísan til þess að á fjörutíu sekúndna fresti falli einhver í heiminum fyrir eigin hendi. Atriðið fjallar um sjálfsvígshugsanir og skilaboðin eru þau að allir sem glíma við slíkar hugsanir geti leitað sér hjálpar, það sé alltaf hægt að finna lausn.

Úrslitakvöld Skrekks fer fram á mánudaginn og verður sýnt í beinni útsendingu á Ríkissjónvarpinu.

Skrekkur Reykjavík Krakkar Grunnskólar