Vara við svika­síðu í nafni Há­skóla Ís­lands

Háskóli Íslands varar við tilraunum til netsvika í nafni Háskólans. Í tilkynningu frá háskólanum kemur fram að búið sé að setja upp vefsíðu í nafni háskólans þar sem notendur eru blekktir með því að skrá sig til náms við skólann. Á sama tíma eru þeir krafðir um greiðsluupplýsingar líkt og sé verið að innheimta skráningargjald skólans.

„Við fyrstu sýn virðist ekkert athugavert við síðuna en þegar grannt er skoðað er margt vafasamt. Aðilar sem hafa svona síður virkar virðast enda æ klókari í að setja gögn fram til að blekkja fólk,“ segir í tilkynningunni og að tilgangur síðunnar sé eingöngu að hafa fé ólöglega af fólki eða til að ná af þeim fjárhagslegum upplýsingum, og nota þær í ólöglegum tilgangi.

Fólk er hvatt til að sniðganga síðuna og forðast það að setja nokkur gögn inn á hana. Eins er fólk hvatt almennt til að sýna ítrustu varúð á netinu og gefa ekki upp upplýsingar á vefsvæðum sé minnsti grunur um að eitthvað vafasamt geti verið á ferðinni.

Athygli er vakin á því að einungis er unnt að skrá sig til náms á heimasíðu Háskóla Íslands, á www.hi.is