Chelsea kaupir markvörð á fjóra milljarða

Chelsea greiðir 25 milljónir punda fyrir leikmanninn eða rúmlega fjóra milljarða íslenskra króna. Þessi 25 ára gamli markvörður skrifaði undir hvorki meira né minna en sjö ára samning við félagið.

Sanchez spilaði 23 leiki fyrir Brighton á síðustu leiktíð áður en hann missti sætið í liðinu til Jason Steele.

„Robert er flottur gæi og góður leikmaður en stundum þarf stjórinn að taka erfiðar ákvarðanir. Ég óska honum alls hins besta í framtíðinni,“ sagði Roberto de Zerbi, knattspyrnustjóri Brighton.

Sanchez var aðeins 15 ára gamall er hann gekk í raðir Brighton frá Levante á Spáni.

Hann mun berjast um spiltíma á Stamford Bridge við Kepa Arrizabalaga en Edouard Mendy er farinn til Sádi Arabíu.