„Ekki verslunar­manna­helgin þar sem allt fýkur til fjandans“

Stærsta ferðahelgi ársins er handan við hornið þar sem ferðalangar krossleggja fingur um að fá gott veður. Einar Sveinbjörnsson, veðurfræðingur hjá Bliku, segir línurnar oft hafa verið hreinni hvað varðar veðurspár fyrir þriggja daga helgina. Hann hefur spáð veðrinu um árabil en þar sem engin vindátt sé ráðandi um helgina þá sé erfitt að benda á einn landshluta fremur en annan hvað varðar góða veðrið.

Einar segir svokallað lægðardrag í háloftunum sem ýti undir skýjamyndun og einhverja úrkomu.

„Það veldur okkur erfiðleikum að sjá hver afurð þess verður niðri við yfirborð,“ segir Einar. Allt bendi til þess að það verði rigning á Suður- og Suðvesturlandi seinni part laugardags.

Von á úrkomu á Þjóðhátíð

„Það er vafamál hvort þetta verði úrkoma sem skipti einhverju máli eða bara smotterí.“

Þá sé von á að fyrrnefnt lægðardrag sendi úrkomubakka yfir Suðurlandið á sunnudeginum.

„Og þar með Vestmannaeyjar,“ segir Einar. Von er á þúsundum á Þjóðhátíð í Vestmannaeyjum um helgina. Þó gestir eigi von á einhverri úrkomu þá er harla ólíklegt að gestir þurfi að flýja inn í íþróttahús þetta árið eins og hefur gerst endrum og sinnum þegar blásið hefur hressilega á landinu.

„Það er engin von á hörmungum,“ segir Einar og lítur á landið í heild.

„Þetta verður ekki verslunarmannahelgin þar sem allt fýkur til fjandans. En þú gætir þurft að hafa lopapeysuna uppi við á kvöldin. Og standa af þér smá rigningu eða skúr.“

Smá úrkoma skipti ekki máli

Hann á von á þokkalegum sumardögum. Það verði svalt við norður- og austurströndina þar sem andi af hafi.

„Hlýja loftið er einhvers staðar annars staðar en á Íslandi. Hitinn er að fara í 15-18 stig þegar best lætur á daginn,“ segir Einar. Hann telur ólíklegt að tuttugu stiga múrinn verði rofinn um helgina.

Flest allir muni finna fyrir dropum úr lofti.

„Ef fólk ætlar að leita að stað þar sem verður alveg þurrt þá er dálítið erfitt að finna hann. Fólk verður að hafa heppnina með sér,“ segir Einar. Hann er eldri en tvævetur í veðurfræðunum.

„Ég segi alltaf að það skipti engu máli þótt það rigni. Á þessum árstíma þornar yfirleitt áður en maður fer heim. Það er í lagi meðan það er ekki vindur sem fylgir.“