Lindar­hvols­skýrslan komin á borð héraðs­sak­sóknara

Þórhildur Sunna Ævarsdóttir, þingmaður Pírata, birti greinargerð Sigurðar í síðustu viku. Birtingin er umdeild og hefur Sigurður kallað eftir því lengi að hún yrði birt. Forseti Alþingis og formaður forsætisnefndar lagðist gegn því að greinargerðin yrði birt og ríkisendurskoðandi hefur sömuleiðis verið harðorður og mælt gegn birtingu hennar.

Félagið Lindarhvoll var stofnað árið 2016 af Bjarna Benediktssyni, þáverandi og núverandi fjármála- og efnahagsráðherra, til þess að halda utan um þær eignir sem ríkið eignaðist vegna stöðugleikaframlaga.

Svokallaðar stöðugleikaeignir komust í eigu ríkissjóðs eftir bankahrunið árið 2008. Umtalsverðar eignir voru í búum stóru viðskiptabankanna þriggja sem ríkið tók yfir. Þar má til að mynda nefna Klakka ehf., Lyfju hf., hluti í Sjóvá-Almennum tryggingum hf. og hluti í Reitum fasteignafélagi hf.

Félaginu var slitið snemma árs 2018 eftir að síðasta stöðugleikaeignin, Lyfja hf., var seld félaginu SID ehf. fyrir um 4,2 milljarða króna. Nú er Festi í viðræðum um kaup á Lyfju og í viðskiptunum er lyfsölukeðjan metin á 7,8 milljarða króna.

Greinargerð bendir til þess að pottur hafi víða verið brotinn

Lengi hefur verið deilt um bæði starfsemi félagsins sem og upplýsingagjöf til almennings um hana. Nú liggur fyrir greinargerð setts ríkisendurskoðanda í málinu. Í greinargerðinni fer Sigurður Þórðarson, settur ríkisendurskoðandi, hörðum orðum um starfsemina og segir til að mynda að vinnubrögð stjórnar og framkvæmdastjórnar hafi verið ábótavant.

Þá greinir hann frá því að fjöldi óútskýrðra greiðslna hafi fundist þegar rýnt var í bókhald Lindarhvols og að samskipti við stjórn og framkvæmdastjórn hafi gert honum vinnuna erfiðari.

Opinber skýrsla ríkisendurskoðanda frá árinu 2020, sem unnin var af þáverandi ríkisendurskoðanda Skúla Eggerti Þórðarsyni, bendir aftur á móti til þess að starfsemin hafi verið með allra besta móti.

Sigurður Þórðarson sendi ríkissaksóknara bréf með gögnum, þar á meðal greinargerð hans, sem nú er svo komin á borð héraðssaksóknara. Þetta staðfestir Ólafur Þór Hauksson héraðssaksóknari við fréttastofu. Vegna sumarleyfa má telja líklegt að einhver tími líði áður en málið verður tekið til skoðunar hjá embættinu.

Stjórnarandstaðan hefur kallað eftir því að þing verði kallað saman á næstunni meðal annars vegna Lindarhvolsmálsins. Auk þess vill stjórnarandstaðan ræða bann við hvalveiðum og sölu á hlut ríkisins í Íslandsbanka. Bjarni Benediktsson hefur gripið þann bolta á lofti og gert grín að því að þingmenn Miðflokksins og Pírata geti verið sammála um einstök mál, sama hversu vitlaust málið sé.