Segir þakklæti bóluefni við kvíða og depurð

Ragnhildur sem er betur þekkt sem Ragga Nagli hvetur fólk til að huga að taugakerfinu með því að veita því athygli og kærleika. „Gerðu það heilbrigt og hamingjusamt og dúndraðu andlegu heilsunni upp í rjáfur,“ segir Ragga.

Í pistlinum nefnir Ragga nokkur dæmi sem gætu eflt og styrkt taugakerfið.

Hreinsaðu til á samfélagsmiðlum

„Dítox frá samfélagsmiðlum og skoðaðu hvaða prófílum þú ert að fylgja og hvaða áhrif það hefur á þig að skoða efnið frá þeim. Gerðu allsherjar hreingerningu og hreinsaðu út það sem innrætir hjá þér ekki-nóguna og fylgdu þeim sem strá glimmeri yfir sálina,“ segir Ragga.

Þakklæti er bóluefni við kvíða og depurð

„Skrifaðu niður fimm hluti, manneskjur, upplifun sem þú vekja hjá þér þakklæti. Hvað var geggjað í dag. Hvað hlakkarðu til á morgun. Þakklæti losar út serótónín og dópamín og er bóluefni við kvíða og depurð því það vekur upp jákvæðar tilfinningar, styrkir jákvæða reynslu í taugabrautunum og byggir sterkari nánari sambönd,“ segir Ragga og telur það skothelda uppskrift að hamingjusamara lífi: „Rannsóknir sýna að þeir sem skrifa niður þakklæti eru jákvæðari og sáttari í lífinu.“

Hvíld er nauðsynleg

„Kríulúr í 20 til 60 mínútur til að hlaða á andlega og líkamlega batteríið. Hvíld er nauðsynleg til að gefa heilanum kaffipásu og endurræsa drifkraft, sköpunargleði og framkvæmdavilja,“ segir í pistlinum þar sem Ragga áréttar að hvíld sé engin leti.

Fleiri skjáir meiri truflun

Þá segir hún að fólk eigi það til að nota tvo skjái í einu. Þar má nefna sjónvarpið og símann eða tölvu. 

„Með þessu ertu að trufla dópamínkerfið og hækka þröskuldinn fyrir að njóta þess að gera bara einn hlut í einu. Þú þarft alltaf meira og meira örvandi áreiti til að upplifa vellíðan.“

Veldu fólkið í kringum þig

Í pistlinum hvetur Ragga fólk að taka eftir því hvernig taugakerfið bregst við eftir því hvaða fólk maður er að umgangast. 

„Við gerum okkur oft ekki grein fyrir hversu mikil áhrif umgengni við óþægilegt fólk hefur á tilfinningalífið og taugakerfið.“

Segðu oftar nei

„Að setja mörk sýnir hugrekkið að elska sjálfan sig en á sama tíma opna á möguleikann að valda öðru fólki vonbrigðum (Brené Brown). 

Segðu oftar NEI við verkefnum og skuldbindingum því heilinn þinn hefur ekki óendanlegt vinnsluminni. Búðu til ný mörk, endurskoðaðu gömul mörk og viðhaltu mörkum sem eru ennþá nauðsynleg.“

Hóflegt magn af koffíni 

Að sögn Röggu hefur koffín áhrif á miðtaugakerfið með þeim afleiðngum að æðar líkamans víkka, hjartað slær örar, öndunin verður grynnri og þörfin fyrir að pissa meiri. 

„En það er í hóflegu magni sem er c.a 100-200 mg á dag (Examine.com) dregur úr þreytu og slens og eykur einbeitninguna. En í nútímasamfélagi þar sem kaffivélin er besti vinur Aðal, og Nocco, Monster, Pepsi Max, Orka og Collab maka krókinn í ofneyslu mannskepnunnar, þá er 400-500 mg á dag orðið sorglegt norm,“ segir hún.

Pistilin má lesa í heild sinni hér að neðan: