Hvalveiðibann skellur fyrir Skagann

Vísir hefur talað við fjölda fólks innan Sjálfstæðisflokksins en þar á bæ telja menn að útspil Svandísar í morgun sé nánast skilnaðarbréf; að hún vilji slíta stjórnarsamstarfinu. Þeir hinir sömu gera fastlega ráð fyrir því að þingflokkurinn verið kallaður saman hið fyrsta til að fara yfir stöðuna.

Haraldur Benediktsson var um árabil þingmaður Sjálfstæðisflokksins í Norðvesturkjördæmi settist í bæjarstjórastól Akranesskaupstaðar í mars mánuði og sagði sig þá frá þingmennsku. Hann segist faglega ráðinn, ópólitískur bæjarstjóri. Og geti ekki tjáð sig um hvað gengur á innan þingflokks Sjálfstæðisflokksins en hins vegar komi þetta fyrirvaralausa bann afar illa við bæjarfélagið.

Reiðarslag að fá svona fyrirvaralausa tilkynningu um bann

„Óvænt og vont. Þetta skiptir samfélagið okkar heilmiklu máli og við vorum að reikna með að það væri að hefjast vertíð,“ segir Haraldur. Hann segir áhrifin víðtæk. Íbúar Akraness sem höfðu gert ráð fyrir því að vinna við veiðarnar og þeir sem hafa með þjónustu og vörukaup eigi heilmikið undir hvalvertíð.

Vísir ræddi fyrir stundu við Vilhjálm Birgisson verkalýðsleiðtoga á Akranesi sem var ómyrkur í máli.

Haraldur tekur í sama streng og segist binda vonir við að það leysist hratt og örugglega úr þessu langa banni sem boðað hefur verið að standi til 31. ágúst. Og það verði lagað sem þarf að laga, ef það er eitthvað. Haraldur segir að veiðar á þeim árstíma séu miklu erfiðari við að eiga en ef róið væri nú.

„Þá er vafasamt að hefja vertíð. Við vitum að það er fólk búið að gera ráðstafanir ráða sig í vinnu, fyrirtæki kaupa aðföng og það sitja allir uppi með stóran skell ef þetta stendur svona.“

Óásættanleg vinnubrögð

Haraldur segir bannið hafa verið óvænt og komið flatt upp á íbúa Akraness. Þau þar hafi vitaskuld fylgst með þeirri umræðu sem fram hefur farið um veiðarnar, sem eru umdeildar, en það hefði átt að vera hægt að komast að niðurstöðu áður en til þessa kom. Til þess hafi verið nægur tími.

„Gera út um aðferðir við veiðar en ekki daginn áður en vertíðin hefst. Miklum verðmætum er kastað á glæ ef það á að standa.“

Haraldur telur vinnubrögðin vart ásættanleg.

„Menn geta sett sig í spor þeirra sem stýra fyrirtæki sem hefur ráðið fullt af mannskap og gert skuldbindaandi samninga við önnur fyrirtæki. Að fá þetta fyrirvaralaust yfir sig er reiðarslag sem menn eiga ekki að þurfa að búa við í því stjórnkerfi sem við erum að reka. Þetta eru óvænt og vond tíðindi sem menn að vinda ofan af, og það verður að gerast fljótt, svo vertíðin geti hafist.“