Djöful­óð Whoopi vill fá djöfulinn í tölvuna

Hin 67 ára Whoopi Goldberg, þekktust fyrir leik sinn í kvikmyndunum Ghost, Sister Act og The Color Purple, birti myndband á Instagram fyrir viku síðan þar sem hún ávarpaði bæði aðdáendur sína og Blizzard til að kvarta undan djöflaleysi í lífi sínu.

Í myndbandinu sagði hún að þrátt fyrir að það væri fullt af hræðilegum hlutum sem ættu sér stað í heiminum þá þyrfti hún að kvarta yfir því að það væri ekki hægt að spila uppáhalds leikinn hennar, Diablo, á Apple-tölvu.

Hún sagðist alltaf hafa spilað leikjaseríuna á Apple-tölvu og að hún vildi líka fá að spila nýjasta leikinn á Apple-tölvu en það væri skyndilega ekki í boði.

Hún sagðist hafa verið gífurlega spennt fyrir leiknum og hefði verið búin að kaupa hann þegar hún komst að því að hún gæti ekki spilað hann „Þetta pirraði mig virkilega mikið,“ sagði hún um þá uppgötvun.

Því biðlaði hún til Blizzard að leyfa Apple-tölvuleikjaspilurum að spila leikinn á stýrikerfinu. Hún bætti við að þegar næsti leikur í seríunni kæmi út gæti framleiðandinn tilkynnt það fyrirfram að leikurinn kæmi ekki út á Mac en að þeir þyrftu að gefa Apple-fólki aðgang.

Diablo IV kom út 6. júní síðastliðinn á Xbox, Playstation 4 og 5 og PC-tölvur. Hér má sjá stiklu fyrir leikinn:

Vill fá endurgreitt

Í fyrradag birti hún annað myndband þar sem hún sagðist enn þá vera pirruð út í Blizzard af því hún hefði ekki heyrt neitt frá þeim eftir kvörtun sína.

Hún sagðist ekki vilja kaupa sér Xbox til að spila leikinn og vildi í staðinn fá endurgreitt.

Hún sagðist ekki hafa fengið netpóst með tilkynningu um að Microsoft ætlaði að kaupa Blizzard. Þá hefði hún ekki keypt leikinn og sagðist vilja fá afsökunarbeiðni frá fyrirtækinu. Fyrst kaupin væru ekki enn gengin í gegn sagði hún að þau ættu annað hvort að gefa leikinn út á Mac eða endurgreiða þeim sem hefðu keypt leikinn.

„Við hefðum getað gert þetta betur, Blizzard,“ sagði hún að lokum.