Ætla að bregða nýju ljósi á Sinfó

„Við viljum koma til móts við hvað sinfóníutónleikar eru virðingarverð og falleg samkoma. Við viljum bæði upphefja það en líka að bregða einhverju nýju ljósi á Sinfó. Auðvitað verða þetta ekki hefðbundnir tónleikar, en gestir Sinfó eru vanir ýmsu, vonandi fáum við þá í Eldborg sem og okkar dyggu hlustendur,“ segir Bergur Ebbi í samtali við Vísi. 

Áður hefur hlaðvarpið, sem sent hefur verið út frá 2014, haldið lifandi viðburði, meðal annars í Borgarleikhúsi og nýjasta verkefnið eru sjónvarpsþættir á Ríkisútvarpinu. 

„Svo kom þessi hugmynd upp að leita til Sinfó, þau eru mjög opin fyrir öllu. Við munum nýta okkur það að hafa fullskipaða hljómsveit til fulls og spila dæmi og lög sem við viljum fíla. Þetta verður blanda af spjalli og músík,“ segir Bergur Ebbi og bætir við að dagskráin sé ekki niðurnegld enn.

Leika sér að samspili popp og klassíkur

En þá er spurningin: kann fílalag að fíla Sinfó?

„Við höfum prófað það. Hlaðvarpið er ekki einskorðað við popptónlist þannig við höfum fílað klassísk verk sem hafa farið inn í dægurmenninguna,“ segir Bergur Ebbi og nefnir kórus-kafla 9. sinfóníu Beethoven og Nessun dorma, sem söngvarinn Pavarotti gerði ódauðlegt.

„Þannig við erum mjög opnir fyrir því að fíla klassík. Svo munum við skoða popp sem er inspírerað af klassík, sem er mjög algengt. 

„Við munum leika okkur með samspil popp og klassíkur, það er af nógu að taka þar.“

Hljómsveitarstjóri er Daníel Bjarnason sem var tilnefndur til Grammy-verðlauna ásamt Sinfóníuhljómsveit Íslands í flokknum Besti hljómsveitarflutningur árið 2020.

„Við erum báðir rosalega spenntir. Þetta er mikill heiður og við munum vanda okkur. En ég hef mjög góða tilfinningu fyrir þessu og Daníel sem mun stýra hefur líka mjög góða tilfinningu fyrir því hvernig við viljum gera þetta,“ segir Bergur Ebbi að lokum.

Miðasala á tónleikana hefst á morgun, föstudaginn 16. júní, á sinfonia.is og í miðasölu Hörpu.