Rifta samningi við verk­taka vegna nýs Kárs­nes­skóla

Morgunblaðið segir frá málinu en þar segir að myglusveppur hafi fundist í byggingunni og að nýir gluggar hafi lekið.

Haft er eftir Ásdísi Kristjánsdóttur bæjarstjóra að lagt hafi verið til að samningnum yrði rift þar sem gallar á verki verktakans hafi komið í ljós og sömuleiðis hafi hann ekki sinnt fullnægandi úrbótum, þrátt fyrir ítrekaðar áskoranir. 

Það sé markmið að framkvæmdum ljúki á fyrri hluta næsta árs, en upphaflega gerðu áætlanir ráð fyrir að kennsla hæfist í hinu nýja húsi næsta haust. Gert er ráð fyrir að í hinum nýja skóla verði samrekinn leik- og grunnskóli ásamt frístund og aðstöðu fyrir tómstundastarf og tónlistarnám.

Mygla greindist í Kársnesskóla við Skólagerði árið 2017 og var að lokum ráðist í að rífa skólann rúmu ári síðar. Starfsemi skólans var þá flutt í húsnæði Kársnesskóla við Vallargerði en árið 2019 greindist sömuleiðis mygla þar.

Rizzani de Eccher átti lægsta tilboðið í útboði vegna byggingu nýs skóla árið 2021, nokkru undir kostnaðaráætlun.

Væntingar fara þverrandi

Í fundargerð bæjarstjórnar kemur fram að í bókun bæjarfulltrúa Sjálfstæðisflokksins að mikilvægt sé að bregðast við þeirri alvarlegu stöðu sem upp sé komin í byggingu nýs Kársnesskóla. 

„Undirrituð telja að Kópavogsbær geti ekki lengur unað við alvarlegar og viðvarandi vanefndir aðalverktaka Kársnesskóla. Ítrekaðar áskoranir til verktakans um að koma verkinu á réttan kjöl hafa ekki borið árangur og væntingar um að verkið klárist með fullnægjandi hætti undir stjórn hans fara þverrandi. Óhjákvæmilegt er því að heimilað verði að taka nauðsynlegar ákvarðanir til að koma verkinu í viðunandi horf með hagsmuni íbúa að leiðarljósi,“ segir í bókuninni.

Riftun gæti haft í for með sér röskun

Átta bæjarfulltrúar Sjálfstæðisflokks, Framsóknar og Vina Kópavogs greiddu atkvæði með riftun, en tveir fulltrúar Pírata og Samfylkingarinnar sátu hjá. Bæjarfulltrúi Viðreisnar greiddi atkvæði gegn. 

Í bókun fulltrúa Pírata, Samfylkingar og Viðreisnar vegna afgreiðslu málsins segir að riftun geti haft í för með sér umtalsverða röskun á byggingu nýs Kársnesskóla.

„Bæði geta orðið tafir á verkinu auk þess sem kostnaður mun að öllum líkindum aukast, enda er líklegt að dýrara sé að fá aðra verktaka til verksins. Þá hafa verktakaskipti almennt neikvæð áhrif á ábyrgð á gæðum verksins, sem verður óskýrari eftir því sem fleiri koma að því. Verktaki hefur í samskiptum sínum við Kópavogsbæ haldið fram vanefndum bæjarins og gert kröfu um framlengingu á verktíma og bætur vegna þess. Undirritaðar telja mikilvægt að leita allra leiða til þess að ná samningum við núverandi verktaka um að ljúka verkinu,“ segir í bókuninni.

Fréttin hefur verið uppfærð.