Lag sem fær fólk til að skrúfa niður bíl­rúðuna

Í fyrri umferð kynntumst við flytjendunum sex og heyrðum brot úr fyrstu útgáfum laga þeirra. Nú hefur hópurinn haft góðan tíma til að fínpússa bæði lögin og gera ýmsar breytingar á þeim.

Í níunda þætti Skúrsins er rætt við Benedikt og Gunnar. Þeir eru nýbyrjaðir að vinna saman og útgáfa þeirra af SS pylsulaginu er eitt af fyrstu verkefnum þeirra saman. „Mér fannst skemmtilegt það sem Árni í dómnefndinni sagði um útsetningu okkar, að þetta væri lag sem léti mann skrúfa niður bílrúðuna meðan það væri í gangi,“ segir Benedikt. „Við vildum einmitt að lagið yrði svona blanda af sumri, gleði, pylsupartýi og stemningu. Okkur fannst gaman að það skuli hafa komist til skila hjá dómnefndinni.“

„Laglínan er glöð, hress og einföld þannig að allir ættu að geta sungið með. Mér fannst okkur takast ágætlega að láta hljóðheiminn passa við það,“ bætir Gunnar við.

Félagarnir gerðu smá breytingar á útgáfu sinni af SS pylsulaginu. „Við vildum fá smá „pönsí kikk“ til að fá aðeins meira pláss fyrir kick-trommuna. Svo fannst okkur bakraddirnar mega vera aðeins sterkari í seinni hlutanum. Annars erum við bara frekar sáttir.“

Sigurvegarinn hlýtur að launum tvær milljónir króna, annað sætið hlýtur eina milljón og þriðja sætið fimm hundruð þúsund. Til viðbótar hljóta höfundar besta frumsamda lagsins eina milljón króna.

Ef þeir standa uppi sem sigurvegarar er Benedikt með á hreinu hvernig hann ætlar að eyða sínum hlut. „Ég er að hefja nám í Bandaríkjunum í haust og mun nota eitthvað af peningunum í það og svo til að búa til meiri tónlist. Þetta er ekki ódýrasta áhugamál í heimi.“

Lokaútgáfur næstu flytjenda verða kynntar í vikunni.