Lára Ómars í hróka­sam­ræðum við tal­gervil

Vilhelm, sem gegnir nafninu Villi naglbítur allt síðan hann var rokkstjarna í 200.000 naglbítar, segir að hann sé til þess að gera nýbyrjaður á því að taka upp þættina sjálfa en það hafði Baldur í Skálmöld gert fram þessa. Og ekki vildi betur til en Villi gleymdi að kveikja á hljóðnema Önnu Svövu.

„Ég gleymdi að kveikja á míkrafóninum hennar Önnu Svövu og það var slökkt á honum fyrst fimm mínúturnar,“ segir Villi.

Meistarataktar tæknimannsins

Voru nú góð ráð dýr. En Baldur tæknimaður, sem gengur frá þáttunum, dó ekki ráðalaus. „Hann skrifaði allt sem hún sagði og lét talgerfil leysa hana af. Útloman er alveg geggjuð,“ segir Villi.

Fyrir þá fáu sem ekki þekkja þættina Nei hættu nú alveg þá er uppleggið spurningaþáttur. Fastir gestir þáttanna, liðstjórar, eru Anna Svava Knútsdóttir leikkona með meiru og Vignir Rafn Valþórsson leikstjóri. Með þeim í liði eru svo tilfallandi gestir. Í þessum þætti voru það þau Lára Ómarsdóttir blaðamaður og Sigtryggur Baldursson tónlistarmaður.

„Þessi þáttur einkennist af tækniklúðri. Því sem næst 10 mínútur komu ekki inn á bandið. En þetta er mjög gott spjall milli Láru og talgervils Önnu Svövu,“ segir Villi.

Þegar Dóri Gylfa ruglaðist á lyfjaglösum

Um er að ræða þátt númer 352. Nei hættu nú alveg hóf göngu sína á Rás 2 fyrir 13 árum en fyrir 3 árum varð hann að sjálfstæðu hlaðvarpi. Eins og áður sagði er þetta spurningaþáttur en fyrirkomulagið er að ætíð eru gefnir upp fjórir möguleikar við misundarlegum spurningum sem byggjast gjarnan á því sem flokkast sem einskis nýtur fróðleikur. Og keppendur reyna að klóra sig í átt að réttu svari.

Villi segir spurður það vissulega athyglisvert hversu óendanlega gaman Íslendingar hafi að spurningaþáttum. „Magnað. Sennilega því það er svo gaman að heyra einhvern vita svaka mikið og um leið heyra einhvern klikka á því sem maður veit sjálfur. Einhvers konar blanda af þessu tvennu. Ætli það sé ekki heróínið í þessu?“ segir Villi. Hann segir margt furðulegt hafa gerst í fyrri þáttum sem taki þessu þó ekki fram. „Halldór Gylfason leikari ruglaðist á lyfjaglösum og tók svefnlyf áður en hann mætti um daginn.“