Innlent

Fundurinn einn sá ein­­kenni­­legasti að mati Sig­mars

Tryggvi Páll Tryggvason skrifar
Birgir Þórarinsson, þingmaður Sjálfstæðisflokksins og Sigmar Guðmundsson, þingmaður Viðreisnar.
Birgir Þórarinsson, þingmaður Sjálfstæðisflokksins og Sigmar Guðmundsson, þingmaður Viðreisnar. Vísir/Vilhelm

Sigmar Guðmundsson, þingmaður Viðreisnar, segir að opinn nefndarfundar Allsherjar- og menntamálanefndar Alþingis, sem haldinn var að beiðni Birgis Þórarinssonar, þingmanns Sjálfstæðisflokksins hafi verið einn einkennilegasti opni nefndarfundur í sögu Alþingis.

Birgir óskaði eftir því að fundurinn yrði haldinn og að þar myndu fulltrúar kærunefndar útlendingamála sitja fyrir svörum nefndarinnar.

Ástæða fundarins voru fregnir þess efnis í síðasta mánuði að Útlendingastofnun hafi ekki synjað neinum ríkisborgara frá Venesúela um vernd í efnislegri meðferð frá því úrskurður kærunefndar Útlendingamála um viðbótarvernd lá fyrir síðasta sumar enda sé stofnunin bundin af úrskurðum nefndarinnar. Af fjórtán hundruð umsóknum sem biðu afgreiðslu í janúar voru níu hundruð frá fólki frá Venesúela.

Birgir átti sviðið á fundinum og var sá sem spurði flestra spurninga. Þar voru mætt Þorsteinn Gunnarsson, formaður kærunefndar útlendingamála, og Jóna Aðalheiður Pálmadóttir yfirlögfræðingur, til að svara spurningum nefndarmanna.

Sigmar Guðmundsson er fulltrúi Viðreisnar í nefndinni og í færslu á Facebook segir hann að fundurinn hafi líklega verið sá einkennilegasti í sögu opinna nefndarfunda á Alþingi.

„Formaður kærunefndar útlendingamála, sem er sjálfstæð kærunefnd, var í þriðju gráðu yfirheyrslu hjá Birgi Þórarinssyni, þingmanni Sjálfstæðisflokksins vegna þess að þingmanninum líkar ekki að kærunefndin skuli styðjast við landslög og flóttamannasamning Sameinuðu þjóðanna í úrskurðum sínum,“ skrifar Sigmar en hann gagnrýndi framgöngu Birgis á fundinum sjálfum.

Á fundinum vildi Birgir fá svör frá fulltrúum kærunefndarinnar um hvort að nefndin teldi sér heimilt til að stofna til „margra milljarða útgjalda“ fyrir ríkissjóð með því að greiða leið fólks til landsins.

Svaraði Þorsteinn því að hlutverk nefndarinnar væri að úrskurða á grundvelli laga um útlendinga. Þar væri ekki minnst einu orði á það að kærunefndin ætti að líta til kostnaðar eða fjölda einstaklinga við úrlausnir nefndarinnar.

Sigmari fannst þessi spurning Birgis með miklum ólíkindum.

„Þingmaðurinn gerir þessa sjálfstæðu kærunefnd ábyrga fyrir þeim kostnaði sem hlýst af úrskurðum hennar, rétt eins og lögin og reglurnar hafi ekkert vægi og að nefndin eigi að líta fram hjá þeim. Þetta er með miklum ólíkindum og með sama áframhaldi styttist í að dómarar landsins fái þriðju gráðu yfirheyrslu um dóma sína frá löggjafavaldinu.“

Alþingi Flóttamenn Flóttafólk á Íslandi Viðreisn Sjálfstæðisflokkurinn

Tengdar fréttir

Mörg ríki með verra drykkjarvatn en Venesúela að mati Birgis

Birgir Þórarinsson, þingmaður Sjálfstæðisflokksins, gerði gæði drykkjarvatns í Venesúela að umtalsefni á opnum nefndarfundi á Alþingi í dag þar sem rætt var um alþjóðleg vernd vegna aðstæðna í Suður-Ameríkuríkinu. Formaður kærunefndar útlendingamála benti Birgir hins vegar á að heildarmat á aðstæðum þar í landi benti til algjörs hruns réttarkerfisins. 

Hafa hægt á af­greiðslu um­sókna frá Venesúela vegna rann­sóknar­skyldu

Útlendingastofnun hefur ekki synjað neinum ríkisborgara frá Venesúela um vernd í efnislegri meðferð frá því úrskurður kærunefndar Útlendingamála um viðbótarvernd lá fyrir síðasta sumar enda bundin af úrskurðum hennar. Af fjórtán hundruð umsóknum sem bíða afgreiðslu eru níu hundruð frá fólki frá Venesúela.

Ákvarðanir byggðar á traustum gögnum en ekki sögu­sögnum

Formaður kærunefndar útlendingamála segir að nefndin geti ekki byggt sína úrskurði á einhverjum sögusögnum um að hugsanlega séu einhverjir milligönguaðilar að lokka fólk til landsins. Nefndin byggi á áreiðanlegustu landsupplýsingum um aðstæður í heimalandinu á hverjum tíma. Dómsmálaráðherra segir að bregðast verði við ákveðinni þróun sem orðið hefur í málum flóttafólks frá Venesúela.

Fólk komi ekki frá Venesúela til að nýta vel­ferðar­kerfið

Ekkert bendir til þess að fólk frá Venesúela komi til Íslands þess að misnota velferðarkerfið í stórum stíl segir þingkona Pírata. Það hryggi hana að menn ýti undir fordóma með slíkum málflutningi. Myndband frá ferðaskrifstofu í Venesúela lofar fólki sem fer til Íslands öllu fögru. 

Mest lesið


Fleiri fréttir

Sjá meira


×

Mest lesið