Á bak við tjöldin í Japan á tökustað Snertingar

Sylvía Rut Sigfúsdóttir skrifar 6. febrúar 2023 15:31

Glæný stilla af Agli Ólafssyni í hlutvereki sínu í kvikmyndinni Snerting. Myndin er tekin upp í Japan, London og á Íslandi. Baltasar Breki Samper

Í Japan standa nú yfir tökur á Snertingu, nýjustu kvikmynd Baltasar Kormáks. Eins og fjallað hefur verið um fer leikarinn Egill Ólafsson með aðaðhlutverkið.

Baltasar Breki Samper er með tökuliðinu í Japan og tók saman myndefni fyrir Vísi af lífinu á bakvið tjöldin á tökustað.

Kvikmyndin er byggð á samnefndri bók eftir Ólaf Jóhann Ólafsson, sem var mest selda bókin á Íslandi árið 2020 og hlaut mikið lof gagnrýnenda. Baltasar og Ólafur Jóhann skrifuðu saman handritið.

Glæný stilla úr kvikmyndinni Snerting. Egill Ólafsson fer með aðalhlutverkið.Baltasar Breki Samper

Ekki með endalaust úthald

Eins og Vísir fjallaði um á síðasta ári keypti eitt stærsta kvikmyndadreifingarfyrirtæki heims réttinn að íslensku kvikmyndinni og er hún ein sú dýrasta sem gerð hefur verið hér á landi.

Sögusviðið er Lundúnir, Ísland og Japan, þar sem tökulið, leikarar og aðrir aðstandendur myndarinnar eru stödd núna. Hér fyrir neðan má sjá mynband sem Baltasar Breki tók á tökustað. Baltasar Kormákur segir að tökurnar í Tókýó hafi verið áskorun.

„Það var úti á götum og við erfiðar aðstæður,“ segir Baltasar Kormákur.

„Þú færð ekki auðveldlega leyfi til að taka upp á götunum og sumt þurftum við að gera meira að segja í leyfisleysi.“

Hann segir líka að Egill hafi ekki endalaust úthald, svo miða þarf tökur út frá því. Eins og fjallað hefur verið um glímir hann við Parkinsons.

„Þetta er búið að vera áhugavert en skemmtilegt.“

Í myndbandinu ræðir leikstjórinn einnig um það hversu áhrifamikið það var að taka upp í Hírósíma, tungumálaerfiðleikana á setti og stöðug skóskipti.

Klippa: Frá tökustað á kvikmyndinni Snerting

Myndadagbók Baltasars Breka frá Japan má sjá hér fyrir neðan.