Stefnir í hörðustu vinnudeilu í áratugi

Það var komið að ögurstundu í viðræðum Eflingar og Samtaka atvinnulífsins þegar fjölmenn samninganefnd félagsins mætti á fund með fulltrúum atvinnurekenda hjá ríkissáttasemjara í morgun með nýtt gagntilboð upp á vasann.

Hafið þið gengið nógu langt til að koma til móts við Samtök atvinnulífsins?

„Við höfum í öllu þessu ferli sýnt mjög einbeittan og eindregin samningsvilja. Hann er einnig sýnilegur í þessu tilboði,“ sagði Sólveig Anna Jónsdóttir formaður Eflingar á leið á fundinn.

Samkvæmt tilboðinu hefðu grunnlaun hækkað á bilinu 40 til rúmlega 64 þúsund krónur en að auki fengju allir 15 þúsund króna framfærsluuppbót. Laun hefðu því samtals hækkað um 55 til tæplega áttatíu þúsund krónur. Til samanburðar gáfu lífskjarasamningarnir um 90 þúsund króna launahækkun á rúmum þremur árum.

Sameiginlegur fundur deiluaðila stóð í raun aðeins yfir í um fimmtán mínútur. Að honum loknum fundaði samninganefnd Eflingar í sínum hópi og eftir um hálftíma ákvað hún að slíta viðræðunum.

„Þá er það bara næsta verkefni samninganefndar Eflingar að setjast niður og undirbúa svo kallaða verkfallsboðun. Svo þarf hún að fara í atkvæðagreiðslu hjá félagsfólki,“ sagði Sólveig Anna.

Halldór Benjamín Þorbergsson framkvæmdastjóri Samtaka atvinnulífsins segir himinn og haf á milli nýjasta tilboðs Eflingar og þess sem samið hafi verið um við mikinn meirihluta fólks á almennum vinnumarkaði. Kostnaðurinn við tilboð Eflingar væri tvöfaldur miðað við þá samninga.

„Ef við hefðum gengið lengra hefðum við þurft að taka upp alla kjarasamningana sem nú þegar hafa verið undirritaðir hér í húsnæði ríkissáttasemjara. Síðan hafa þeir farið í atkvæðagreiðslu meðal stéttarfélaganna, SGS, VR og iðnaðarmanna. Vel að merkja þessum samningum hefur verið tekið mjög vel af þjóðinni og verið samþykktir af 80 til 90 prósent af öllum launþegum í þeim stéttarfélögum sem við höfum samið við,“ sagði Halldór Benjamín.

Formaður Eflingar segir engar raunverulegar viðræður hafa farið fram á fundinum í morgun.

„Það hefur náttúrlega alltaf verið þannig að SGS samningurinn er það sem á að láta okkur taka við. Við höfum aftur á móti, eins og ég hef margoft komið á framfæri, útskýrt með mjög málefnalegum og vel ígrunduðum hætti að hann hentar okkur ekki,“ segir Sólveig Anna.

Kjarasamningar við sveitarfélögin eru enn í gildi og renna ekki út fyrr en í vor. Halldór Benjamín segist hugsi yfir að stór hluti samninganefndarfólks Eflingar starfaði hjá hinu opinbera og væri því ekki aðilar að samningum við Samtök atvinnulífsins.

„En eru engu að síður á sama tíma að taka ákvörðun um viðræðuslit og mögulegar verkfallsaðgerðir á almennum vinnumarkaði sem þau starfa ekki einu sinni á,“ sagði Halldór Benjamín Þorbergsson.