Kokkalandsliðið stefnir aftur á gullið

Árni Sæberg skrifar 26. nóvember 2022 13:14

Kokkalandsliðið ætlar sér stóra hluti á heimsmeistaramótinu í matreiðslu. Klúbbur matreiðslumanna

Íslenska kokkalandsliðið hefur keppni á heimsmeistaramótinu í matreiðslu í dag. Liðið vann til gullverðlauna á síðasta heimsmeistaramóti árið 2018 og stefnir ótrautt á að endurtaka leikinn.

Heimsmeistaramótið var sett í gær í Lúxemborg og leikar hefjast í dag með keppni í þriggja rétta heitum matseðli sem eldaður er fyrir 110 manns. Þá verður keppt í þrettán rétta „fine-dining“ máltíð fyrir 12 manns, svokölluðu „Chef’s Table“ á þriðjudag, að því er segir í fréttatilkynningu frá Klúbbi matreiðslumanna, sem rekur kokkalandsliðið.

Haft er eftir Þóri Erlingsyni, forseta klúbbsins, að undirbúningur og ferðalagið hafi gengið vel og æfingar síðustu mánaða gefi ekki annað en ástæðu til bjartsýni.

Þá gefur ekki síður ástæðu til bjartsýni að liðið hafi staðið sig vel í síðustu stóru keppni, Ólympíuleikunum í Stuttgart árið 2020, þar sem liðið fékk bronsverðlaun fyrir samanlagðan árangur.

Í tilkynningunni segir að keppnismatreiðsla sé í rauninni frádráttarkeppni og fyrirkomulagið sé þannig að allir byrji með 100 stig sem lækka síðan með tilliti til snyrtimennsku, fagmennsku, útlits rétta og bragðs. Gullframmistaða sé 90 stig, silfur 80 stig og brons 70 stig. Á mótinu í ár séu um 20 lönd sem taka þátt. Úrslit verði svo kynnt í Lúxemborg á fimmtudaginn og liðið komi aftur heim á föstudag.

Íslenska kokkalandsliðið er skipað eftirfarandi: