Varað við stormi á Vestfjörðum síðdegis

Ganga á í norðaustan hvassviðri eða storm norðvestantil á landinu. Viðvörunin á Vestfjörðum gildir frá klukkan 17:00 síðdegis til klukkan 14:00 á morgun. 

Vegagerðin varar við því að á Steingrímsfjarðarheiði og á Þröskuldum sé útlit fyrir krapa síðdegis. Í kvöld eigi að kólna og gera hríð. Á morgun er spáð norðaustan 17-22 metrum á sekúndu og snjóbyl á sömu heiðavegum. Á Klettshálsi er spáð skafrenningi og blindu en hríð á Gemlufallsheiði.

Suðvestantil á að vera að mestu þurrt í dag. Mun hægara veður verður annars staðar á landinu en norðvestantil á morgun. Draga á úr vindi og úrkomu þar annað kvöld.