Svan­dís fari með fleipur um erfða­b­löndun eldis­­laxa og villtra laxa

Jóhannes rak upp stór augu þegar hann las frétt Fréttablaðsins undir þessari fyrirsögn: „Ekki staðfest erfðablöndun milli eldislaxa og laxa úr villtum stofnum“ þá með vísan til svara Svandísar þar um á þinginu.

Jóhannes hefur ritað Svandísi afdráttarlaust bréf vegna málsins og farið fram á fund með ráðherra. Í bréfi hans segir að þarna sé „ranglega farið með staðreyndir“ og meðfylgjandi er skýrsla frá í febrúar á þessu ári „Stofngerð laxastofna og hlutdeild eldislaxa úr sjókvíaeldi í Fífustaðadalsá og Selárdalsá - Greinargerð til Fiskræktarsjóðs". Skýrsluna má finna hér neðar í „tengdum skjölum“.

Ótrúlegar fréttir um þekkingarleysi ráðherra

Jóhannes furðar sig á því sem vinnubrögðum sem hann segir búa að baki rangri fullyrðingu Svandísar, að vegna þess að ekki hafi verið skráðir stofnar á tilteknu svæði þá séu þeir ekki til. Í samtali við Vísi segir hann að þessu megi líkja við það ef ekki hefðu verið til staðar talningar á örnum á Íslandi á sínum tíma þá væri niðurstaðan sú að ekki tæki því að vernda arnastofninn. „Þetta eru galin vísindi. Ef mönnum er alveg sama um laxastofninn þá verða menn bara að segja það og koma til dyranna eins og þeir eru klæddir,“ segir Jóhannes.

Í bréfi hans til Svandísar tæpir hann á niðurstöðum skýrslunnar sem staðfesta erfðablöndun í íslenskum ám á milli eldislaxa og laxa úr villtum stofnum. Skýrslan hafði ekki verið gerð aðgengileg á vefnum þar sem unnið var að ritrýndum greinaskrifum á grunni þeirra niðurstaðna sem fjallað er um í henni.

„Í ljósi ótrúlegra frétta dagsins sem birtar eru í Fréttablaðinu þar sem staðhæft er að slík erfðablöndun sé ekki til staðar í ám hérlendis þá er hér brugðist við með því að koma umræddum niðurstöðum á framfæri sem vitna um hið gagnstæða,“ segir Jóhannes í bréfi til ráðherra.

Vill leiðrétta rangfærslur í ráðuneytinu

Jóhannes segir jafnframt fróðlegt að benda á tilvik úr sömu rannsókn; þar sem stofngerð uppvaxandi laxaseiðis í Selá í Steingrímsfirði vitnaði um að báðir foreldrarnir reyndust hafa verið eldislaxar.

„Þetta sýnir að í íslenskum ám sem fóstra villta laxastofna er nú þegar að finna erfðablandaða laxa og hreina eldislaxa frá hrygningu í þeim ám.“

Í bréfinu óskar Jóhannes eftir fundi með Svandísi vegna þess forsvars sem hún hefur að gegna í málaflokknum þá með það fyrir augum að koma á framfæri upplýsingum um hvernig bæta megi opinbera stjórnsýslu er tekur til eldis á laxi í opnum sjókvíum hér við land.

• Stofngerð_laxastofna_og_hlutdeild_eldislaxa_-_Fifustadalsa_og_Selardalsa_-greinargerd_februar_2022PDF506KB
  Sækja skjal