Æsilegir ástarfundir og spælt egg í plastpoka

Bókin er afurð námskeiðs í Háskóla Íslands sem hópurinn sat síðasta vor. Huldar Breiðfjörð og Einar Kári Jóhannsson voru leiðbeinendur námskeiðsins. Þar sameinuðust tíu nemendur út meistaranámi í ritlist og sex nemendur úr ritstjórnar- og útgáfunámi. 

Útgáfuhús Unu gaf út bókina en Margrét Weisshappel hannaði kápuna og braut hana um. Blaðamaður heyrði í Berglindi Ernu, einum af höfundum bókarinnar, og fékk að heyra af ferlinu.

Hvernig er að vinna sextán saman að bók?

Það hefur verið skrautlegt ferli og mjög skemmtilegt. Ákvarðanataka varðandi hitt og þetta sem að kom útgáfuferlinu var kannski aðeins flóknari en gengur og gerist. Sextán manneskjur hafa náttúrulega sextán skoðanir, ekki alltaf þær sömu, svo það var mikið farið yfir málin og rætt fram og til baka til að komast að niðurstöðum varðandi eitt og annað. 

Þegar sneri að hlutum eins og yfirlestri og hugmyndavinnu þá var það þó frábært að hafa svona breiðan og vel mannaðan hóp og held ég að það skili sér í fjölbreyttum og sérstaklega áhugaverðum sögum.

Hvernig er hún uppbyggð?

Í bókinni er að finna fjöldann allan af sögum og ljóðum og meira að segja nokkrar myndir. Sögurnar eru sumar langar og aðrar stuttar, einhverjar jafnvel örstuttar. 

Í sumum sagnanna eru ljóð og einhverjum persónum má sjá bregða fyrir í fleiri en einni sögu, ef vel er að gáð. Bókin hefst á lokun Hótel Sögu og endar á aldamótasögu. 

Þar á milli er síðan að finna allt milli himins og jarðar.

Hvaðan kom þemað?

Í byrjun námskeiðsins vorum við vissar um að við vildum hafa eitthvað sterkt þema sem myndi binda bókina alla saman. Upp komu hugmyndir eins og IKEA, vampírur eða einhver ákveðinn tími dags en að lokum horfðum við út um gluggann, á þetta glæsilega hús sem Hótel Saga er, og sáum strax hvað það voru miklir möguleikar þar. 

Hótel er eins og lítill heimur, þar sem fólk kemur hvaðanæva að úr heiminum, til að búa um stund. Sumir hafa ákveðið erindi en aðrir eru óvissir um hvað þeir séu að gera á þessum nýja stað. Einhverjir hengja fötin sín upp í skápnum um leið og þeir koma inn á herbergið en aðrir opna varla töskuna. Sumir fara strax í sturtu, aðrir láta renna í bað rétt eftir miðnætti og enn aðrir þola ekki baðherbergi á hótelherbergjum og forðast þau í lengstu lög. 

Tilfinningar eru bældar eða brjótast fram, kannski ertu að flýja eitthvað eða finna eitthvað. Hótel færa mann í nýjan heim og okkur fannst það kannski sérstaklega viðeigandi eftir að hafa verið svo að segja föst á sama staðnum í tvö ár. Það eru nefnilega svo margt sem hægt að er vinna með út frá þemanu hótelsögur.

Við hverju geta lesendur búist?

Lesendur geta búist við öllum skalanum; æsilegum ástarfundum, foreldrafundum, starfsmannadrama, draugasögum og tinderævintýrum. Tár, flugeldar, fjölskylduerjur, spælt egg í plastpoka og margt fleira sem lestur þessarar bókar býður upp. Svo auðvitað hlaðborð og glæstar veitingar, því má ekki gleyma. 

Þetta er svona bók sem er gott að glugga í þegar mann langar í annan heim, út í heim, en líka þegar mann langar bara heim.

Hvað er framundan hjá ykkur?

Leiðir okkar allra liggja í sitthvora áttina, þó við munum eflaust leita hver til annarrar í framtíðinni. Ritstjórnarnemarnir eru margir hverjir farnir að vinna á fréttamiðlum eða hjá bókaforlögum en við rithöfundarnir snúum okkur bara aftur að skrifum. Einhverjar okkar eru nýbúnar að gefa út bækur og aðrar eru að vinna í handritum að skáldsögum og smásagnasöfnum.