Anna Sor­okin telur sig eiga skilið að fá annað tæki­færi

Hinni 31 árs Sorokin var sleppt úr fangelsi í síðustu viku og var hún flutt í stofufangelsi til að afplána eftirstöðvar dómsins. Hefur henni verið gert að vera með ökklaband og meinað að vera á samfélagsmiðlum. Er enn óljóst hvort að henni verði vísað úr landi eður ei.

Hún ræddi við fréttamann CNN í stofufangelsinu í viðtali sem birt var í gær. Kom þar skýrt fram að hún vilji dvelja áfram í Bandaríkjunum og ekki þurfa að fara aftur til Evrópu. „Það myndi þýða að ég yrði að sætta mig við þá merkimiða sem þeir hafa reynt að festa á mig,“ sagði Sorokin í samtali við CNN.

„Mér líður þannig að ég eigi skilið að fá annað tækifæri. Ég gerði mistök og ég hef afplánað minn dóm. Ég vil meina að ég ætti að fá annað tækifæri.“

Hægt er að sjá viðtal Jake Tapper, fréttamanns CNN, við Sorokin að neðan. 

Svikahrappur

Mál Önnu Sorokin, sem einnig hefur verið þekkt sem Anna Delvey, hefur vakið mikla athygli síðustu ár og voru gerðir sjónvarpsþættir á Netflix um sögu hennar, Inventing Anna, þar sem hin 28 ára Julia Garner fór með hlutverk Sorokin.

Sorokin fæddist í Rússlandi árið 1991 en flutti til Þýskalands ásamt fjölskyldu sinni þegar hún var fimmtán ára gömul. Nítján ára flutti hún ein til Parísar og var komin til New York árið 2013. Þar bjó hún reglulega á dýrum hótelherbergjum, sem hún kom sér undan að greiða fyrir samkvæmt gögnum sem lögð voru fram í dómsmáli hennar.

Þegar hún var komin á þrítugsaldurinn varði hún tíma sínum með yfirstéttinni í Manhattan og var búin að telja mörgum trú um að hún væri einkaerfingi sjóðs metinn á 60 milljónir Bandaríkjadala. Á sama tíma var hún mjög virk á samfélagsmiðlum þar sem hún birti myndir af lúxuslífi sem hún lifði.

Ævintýrinu lauk árið 2017 þegar hún var handtekin eftir að geta ekki greitt reikning vegna hótelshádegisverðar að andvirði um 200 dala.

Útrunnin vegabréfsáritun

Sorokin hafði setið í fangelsi í um fimm hundruð daga þegar hún hlaut fjögurra til tólf ára dóm árið 2019 fyrir brot sín. Vildi dómari meina að hún hafi svikið um 200 þúsund Bandaríkjadala. Hún lauk afplánun fangelsisdómsins í febrúar 2021 en einungis sex vikum síðar var hún handtekin af bandarískum innflytjendayfirvöldum fyrir að vera með útrunna vegabréfsáritun.

Sorokin sagðist í viðtalinu við CNN vera „himinlifandi“ með að vera laus úr fangelsi. „Mér líður þannig að ég fái tækifæri til að bæta fyrir það sem ég hef gert rangt.“

Í viðtalinu ræddi Sorokin einnig þættina Inventing Anna, sem hún segir að hún eigi eftir að sjá, og túlkun Garner á sér. Sorokin seldi Netflix réttinn að sögu sinni og nýtti fjárhæðirnar meðal annars til að greiða niður skuldir sínar og sektir í New York.

Í viðtalinu segist hún vona að í framtíðinni geti lifað á listsköpun sinni og hlaðvarpi sínu