Sjálfsrækt í sumarfríinu: „Það er þakklætið sem gerir okkur hamingjusöm“

Í sumar deilir hún einföldum og skemmtilegum verkefnum með lesendum Vísis sem miða að því að auka vellíðan í sumarfríinu.

Gefum henni orðið:

Dagbókarskrif er verkfæri sem ég nota daglega og er partur af minni sjálfsrækt. Þau skrif sem hafa orðið að daglegri venju hjá mér eru þakklætisskrif. Þakklæti hefur verið töluvert rannsakað innan jákvæðrar sálfræði. Sú nálgun sálfræðinnar einblínir á þá þætti sem hafa jákvæð áhrif á einstaklinga og hópa og hvað fær þá til að blómstra. 

Þakklætið gerir okkur hamingjusöm

Þegar við lítum á lífið í heild sinni, bæði hæðir og lægðir, þá hvetur þakklætið okkur til að líta á það sem gengur vel í lífinu. Talað er um að því þakklátari sem við erum því meira höfum við til að vera þakklát fyrir. Í sálfræðirannsóknum hefur komið í ljós að þakklæti hefur mest áhrif á hamingju einstaklinga. „Það er ekki hamingjan sem gerir okkur þakklát, það er þakklætið sem gerir okkur hamingjusöm“(Robert Steindl Rast).

Lífið er nú þegar fullt af gjöfum

Sá fræðimaður innan jákvæðrar sálfræði sem hefur rannsakað þakklæti hvað mest er Dr. Robert A. Emmons. Í einni rannsókn kom í ljós að skrif í þakklætisdagbók jók hamingju þátttakenda um 25% ásamt því að hafa fleiri góð áhrif í för með sér eins og betri svefn og minni streitu. 

Það er því til mikils að vinna og um að gera að taka fram dagbókina strax í dag og byrja að skrifa hvað þú getur þakkað fyrir í lífinu. Líf þitt er nú þegar fullt af gjöfum, þú þarft bara stundum aðstoð við það að koma auga á þær.

Ráð í þakklætisskrifum

Hér koma 10 ráð fyrir þakklætisskrifin:

1. Taktu ákvörðun um að þú ætlir að skrifa í þakklætisbók nokkrum sinnum í viku.
2. Ákveddu hvenær þú ætlar að skrifa. Best er að skrifa alltaf á sama tíma t.d. á kvöldin fyrir svefninn eða á morgnanna þegar þú færð þér fyrsta kaffibollann.
3. Búðu þér til notalegan griðarstað fyrir skrifin t.d. í einu horni heimilisins eða við hlið rúmsins.
4. Notaðu þakklætiskveikjur t.d. tónlist, ilmkjarnaolíur eða kertaljós en það getur ýtt undir skrifin.
5. Þú getur líka sett áminningu í símann þinn eða skreytt heimilið með fallegri þakklætistilvitnun og haft á fjölförnum stað til að minna þig á.
6. Skrifaðu um allar blessanir þínar, stórar sem smáar.
7. Ef þig skortir hugmyndir þá getur verið nóg að líta í kringum þig og þakka fyrir allt sem augað fangar.
8. Reyndu að auka fjölbreytnina dag frá degi og skrifaðu eitthvað nýtt í hvert skipti.
9. Gott getur verið að líta yfir farinn veg og skoða það sem þú hefur skrifað til að minna þig á allt það góða sem er í lífi þínu.
10. Deildu þakklætinu með öðrum og notaðu hvert tækifæri til að sýna þakklæti í orði og verki.

Þú finnur fróðleik, innblástur og fleira skemmtilegt inn á miðlinum Töfrakistan á Instagram.

Farðu vel með þig og hlúðu að þér í sumarfríinu.