Líkir úr­slita­leiknum við hina full­komnu kvik­mynd en er sjálfri líkt við Iniesta og Busquets

Putellas, fyrirliði Barcelona og besta fótboltakona heims, mun leiða lið sitt út á Allianz-völlinn í Torínó síðar í dag. Hún var hluti af Barcelona-liði sem vann þrefalt á síðustu leiktíð og getur nú endurtekið leikinn. 

„Þetta er eins og hin fullkomna kvikmynd þar sem þetta byrjaði með tapi gegn þeim á sínum tíma. Við getum nú varið titilinn gegn liðinu sem sýndi okkur á hvaða getustig við þurftum að komast til að verða meistarar,“ sagði Putellas á blaðamannafundi fyrir leik dagsins.

Liðið hefur í raun spilað betur á þessari leiktíð en þeirri síðustu, því til sönnunar er nóg að benda á að það vann alla 30 deildarleiki sína á Spáni. Þá hafa Börsungar einnig verið óstöðvandi í Meistaradeild Evrópu. Það er ef frá er talinn leikur gegn Sveindísi Jane Jónsdóttur og stöllum í Wolfsburg í síðari leik liðanna í undanúrslitum Meistaradeildar Evrópu.

Nú er komið að úrslitaleiknum og það gæti farið svo að önnur íslensk landsliðskona - fyrirliðinn Sara Björk Gunnarsdóttir - sjái til þess að Putellas og öll Katalónía fari tárvot á koddann í kvöld.

Minnir á Busquets og Iniesta 

Undanfarin misseri hafa ekki verið gjöful fyrir karlalið Barcelona. Á sama tíma hefur kvennalið félagsins blómstrað og þá sérstaklega prímusmótorinn Putellas. 

Aðspurður segir Antonio Contreras – þjálfari Putellas hjá Levante tímabilið 2011-2012 – að hún minni sig á bæði goðsögnina Andrés Iniesta og Sergio Busquets, einn besta djúpa miðjumann síðari ára.

„Hún er mjög klók á vellinum, tæknilega góð en nú er hún mun taktískari en áður.“

Missti föður sinn fyrir tvítugt

Líf hinnar 28 ára gömlu Putellas hefur hins vegar ekki alltaf verið dans á rósum. Það eru tíu ár síðan hún missti föður sinn, en hann var hennar helsti aðdáandi. Mætti hann á alla leiki og hvatti stelpuna sína áfram.

Það var í gegnum föðurættina sem áhugi Putellas á fótbolta kom. Áhugi sem leiddi til þess að hún spilaði með strákunum í skólanum, strákunum sem rifust um hver fengi að vera með Putellas í liði samkvæmt æskuvini hennar Marc Guinot.

Það er því augljóst að þó faðir hennar hafi fallið frá fyrir áratug síðan þá hafði hann gríðarleg áhrif á feril dóttur sinnar. Feril sem flestum dreymir aðeins um.

Leikur Barcelona og Lyon í úrslitum Meistaradeildar Evrópu verður líkt og öll keppnin sýnd á Youtube-rás DAZN. Hlekkur á útsendinguna sem og beina textalýsingu má finna hér á Vísi klukkan 16.30.