Sjóðurinn varð til við uppskiptingu gamla Íbúðalánasjóðsins. Hann heldur utan um lánasafn Íbúðalánasjóðs en stofnunin sjálf sameinaðist Mannvirkjastofnun í Húsnæðis- og mannvirkjastofnun.
Lækkun vaxta á síðustu árum hefur leitt til mikilla uppgreiðslna á útlánum ÍL-sjóðs. Þar sem sjóðurinn er hættur útlánastarfsemi er uppgreiðslum ráðstafað í innlán og skuldabréf sem bera í dag lægri vexti en eru á skuldum sjóðsins.
Uppgreiðslur héldu áfram á útlánasafni á árinu þrátt fyrir að aðeins hafi hægt á vexti þeirra frá árinu á undan. Uppgreiðslur útlána umfram samningsbundnar afborganir námu 49,4 milljörðum króna á árinu 2021 samanborið við 92,5 milljarða árið 2020.
Ríkisábyrgð er á skuldum sjóðsins og er gert ráð fyrir að reyna muni á þá ábyrgð á komandi árum. Fram kemur í fjármálaáætlun 2023-2027 að verði sjóðurinn rekinn út líftíma skulda, og að gefnum forsendum um þróun vaxta og verðbólgu, megi gera ráð fyrir að núvirt framtíðartap geti verið um 230 milljarðar króna. Sjóðurinn á nægt laust fé til að mæta afborgunum skulda samkvæmt áætlunum til 2034.
ÍL-sjóður hefur veitt ríkissjóði lán að fjárhæð 190 milljarðar króna frá upphafi árs 2020. Verulega hefur dregið úr lánsfjárþörf ríkissjóðs og ekki er gert ráð fyrir frekari lánveitingum úr ÍL-sjóði.
Rekstrarkostnaður ársins nam 193 milljónum króna. Hann samanstendur að mestu af greiðslum til Húsnæðis- og mannvirkjastofnunar vegna umsýslu lánasafnsins sem og annarri aðkeyptri þjónustu, auk framlaga til Umboðsmanns skuldara og kostnaðar sem tengist verðbréfaútgáfu sjóðsins.
