Þolendur ofbeldis þurfa að þroskast hratt

Lagið er fyrsta smáskífa hljómsveitarinnar og jafnframt fyrsta útgefna lagið af fyrstu plötu sveitarinnar, sem væntanleg er í haust. Villain Origin Story er rétt tæplega fjögurra mínútna langt poppað rokklag. Textinn lýsir því hve hratt þolendur ofbeldis þurfa að þroskast og falskri mynd ævintýra um draumaprins.

Tónlist hljómsveitarinnar er innblásin af verkum fjölmargra sveita sem nutu töluverðra vinsælda um aldamótin og undir lok síðustu aldar. Til dæmis Cranberries og Paramore svo fátt eitt sé nefnt. Tragically Unknown samanstendur af Oddi Mar Árnasyni gítarleikara, Helenu Hafsteinsdóttur söngkonu, textasmið og lagahöfundi og Þórgný Einari Albertssyni bassaleikara og lagahöfundi. Hljómsveitin var stofnuð í október 2021 og vinnur nú að upptökum á tíu laga plötu.

Helena og Þórgnýr búa að nokkurri fyrri reynslu af tónlist. Helena er með miðstigs gráður í klassískum söng, píanó og tónmennt, vinnur að framhaldsprófi í klassískum söng og er helmingur popp dúettsins Heró. Þórgnýr hefur gefið út raftónlist undir listamannsnafninu Thorgnyr. Öll tónlist og allir textar eru frumsamdir af meðlimum hljómsveitarinnar.

Instagram / TikTok