Alfreð í byrjunarliðinu í tapi | Dortmund valtaði yfir Wolfsburg

Alfreð hóf leik í fremstu víglínu en var tekinn af velli á 56. mínútu. Nokkrum mínútum áður hafði Suat Serdar komið gestunum frá Berlín yfir, en það reyndist eina mark leiksins.

Niðurstaðan varð 1-0 sigur Hertha Berlin, en liðið er nú með 29 stig í 15. sæti deildarinnar. Alfreð og félagar í Augsburg sitja sæti fyrir ofan með 32 stig.

Þá vann Dortmund afar sannfærandi 6-1 sigur gegn Wolfsburg í leik sem var búinn í hálfleik. Tom Rothe, Axel Witsel, Manuel Akanji, Emre Can og Erling Braut Haaland sáu um markaskorunina í fyrri hálfleik og staðan var því 5-0 þegar gengið var til búningsherbergja.

Norski framherjinn Erling Braut Haaland bætti svo öðru marki sínu við snemma í síðari hálfleik og staðan orðin 6-0. 

Ridle Baku klóraði í bakkann fyrir gestina þegar tæpar tíu mínútur voru til leiksloka og þar við sat. Niðurstaðan varð 6-1 sigur Dortmund, en liðið situr í öðru sæti þýsku deildarinnar með 63 stig eftir 30 leiki, sex stigum minna en topplið Bayern.

Að lokum vann Freiburg öruggan 3-0 sigur gegn Bochum, en Mainz og Stuttgart skiptu stigunum á milli sín þegar liðin gerðu markalaust jafntefli.