Ákærður fyrir að kasta bjórglasi í dómara

Maðurinn kastaði bjórglasi í höfuð aðstoðardómarans sem hlaut heilahristing og var sendur á sjúkrahús.

Atvikið átti sér stað fyrir tveimur vikum en eftir að hafa rætt við vitni, skoðað sjónvarpsmyndir af atvikinu og aflað frekari gagna hefur lögreglan nú gefið út ákæru.

Staðan í leiknum var 2-0 fyrir Mönchengladbach þegar leikurinn var stöðvaður vegna atviksins, á 68. mínútu. Mönchengladbach var svo í kjölfarið úrskurðaður 2-0 sigur í leiknum.

Aðeins eitt stig skilur að Mönchengladbach og Bochum í þýsku 1. deildinni en þau sitja í 11. og 12. sæti, sjö og sex stigum frá fallsæti en fjarri baráttunni um Evrópusæti.