Olíu­verð lækkaði tölu­vert við opnun markaða

Þetta er rakið til orðróms sem er á þá leið að Joe Biden Bandaríkjaforseti muni í dag kynna áætlun sem miðar að því að Bandaríkjamenn gangi á birgðir sínar og auki þannig framboð á olíu í heiminum um 180 milljónir tunna. Ef þetta gengur eftir þá verður um mestu innspýtingu úr varaolíusjóðnum að ræða síðan í olíukreppunni 1974.

Stríðið í Úkraínu hefur hleypt upp olíuverði um allan heim og eru hækkanirnar orðnar að stórpólitísku máli í Bandaríkjunum, en þar verður kosið til þings næsta haust.

Búist er við tíðindum frá Biden í þessum málum um klukkan hálf sex að íslenskum tíma. Þá er fyrirhugaður fundur með fulltrúum olíuframleiðsluríkjanna, OPEC og Rússa. En hingað til hafa ríkin ekki viljað auka um of framleiðsluna, þrátt fyrir stríðið og viðskiptaþvinganir gegn Rússum, sem eru önnur stærsta olíuútflutningsþjóð heims.