Nadine og Þórhildur störfuðu árum saman sem fréttakonur, bæði á Stöð 2 og á RÚV, áður en þær hurfu til annarra starfa fyrir skemmstu. Þórhildur fékk blaðamannaverðlaun ársins í fyrra og Nadine var verðlaunuð fyrir rannsóknarblaðamennsku ársins.
Þættirnir heita Eftirmál og eru aðgengilegir á Tal, hlaðvarpsveitu Sýnar hér á Vísi og í Bylgjuappinu og á öllum helstu hlaðvarpsveitum. Fyrsti þátturinn fór í loftið í dag.
Ósagðar hliðar á þekktum málum
Í Eftirmálum munu þær rifja upp fréttamál sem einhverra hluta vegna sitja í þeim, bæði gömul og nýlegri. Í þáttunum koma fram lykilupplýsingar sem vantaði í umfjölluninni á sínum tíma og varpa nýju ljósi á málin.
„Þegar rykið er sest lítur maður þessi stóru mál öðrum augum og nálgast þau frá öðru sjónarhorni. Þá kemur í ljós að helstu persónur og leikendur þessara mála hafa ýmislegt að segja um þau í dag, til dæmis eitthvað sem þau þorðu ekki að segja á sínum tíma því málin voru svo viðkvæm. Það hefur komið okkur verulega á óvart hvað viðmælendur okkar hafa verið reiðubúnir að opna sig og greina frá hliðum þessara mála sem hafa hingað til verið ósagðar,” segir Nadine Guðrún Yaghi.
„Það er hægara sagt en gert að hætta í fréttum og þó við störfum ekki lengur við þetta höfum við enn mikinn áhuga á öllu sem tengist fréttamálum, og þá sérstaklega mannlegu hliðinni. Svo í spjalli yfir kaffibolla einn daginn kom upp þessi hugmynd, að við ættum kannski að finna leið til að fá útrás fyrir fréttafíknina. Og við slógum bara til. Eru ekki allir með hlaðvörp um áhugamálin sín í dag?” segir Þórhildur.
„Hugsunin er að tala um þessi mál, sem oft eru mjög flókin, á mannamáli og gera þau þannig aðgengilegri. Málin eru misþung en við reynum að ræða þau okkar á milli á léttum nótum,”
segir Nadine.
Forvitnustu konur landsins
„Við Þórhildur erum góðar vinkonur og okkur hefur alltaf langað til að gera eitthvað sniðugt saman, svo þetta er ágætis leið til að fá útrás fyrir þetta sameiginlega áhugamál. Hlaðvarpið er mjög spennandi miðill og möguleikarnir endalausir,” bætir hún við.
Nadine og Þórhildur fengu Adelinu Antal til liðs við sig en hún er reynslumikill framleiðandi með mikla þekkingu á ýmis konar dagskrárgerð.
„Ég hef hlustað mjög mikið á hlaðvörp undanfarin ár og mér hefur fundist vanta hlaðvarp í þessum stíl inn í íslenska hlaðvarpsheiminn, þar sem pródúksjónið er aðeins meira, viðtöl, spjall og fréttabútar fléttast saman og hljóðheimurinn spilar stórt hlutverk,” segir Þórhildur.
„Svo er það nú bara þannig að við erum forvitnustu konur landsins svo okkur finnst þetta alveg sjúklega skemmtilegt,”
bætir Nadine við. Eftirmál hófu göngu sína í dag og þættirnir verða öllum aðgengilegir á Tal, hlaðvarpsveitu Sýnar hér á Vísi.
Í fyrsta þættinum sem heyra má hér fyrir neðan, fjalla þær um Fjárkúgunarmálið.
„Í júní 2015 gerðu systurnar og fjölmiðlakonurnar Hlín Einarsdóttir og Malín Brand tilraun til að kúga milljónir út úr Sigmundi Davíð Gunnlaugssyni, þáverandi forsætisráðherra. Lögreglan tók fjárkúguninni mjög alvarlega og sérsveitarmenn fóru í dulargervi og umfangsmiklar aðgerðir þegar peningarnir voru afhentir. Málið átti svo eftir að snúast upp í ákveðinn farsa og fjölmiðlasprengju. Sigmundur Davíð tjáir sig um atburðarásina í fyrsta sinn í þættinum.“
