Askja hefur hjólasumarið ásamt því að frumsýna nýjan HR-V

Nýr Honda HR-V er með 1,5 lítra Hybrid vél sem skilar 131 hestöflum og 253 Nm í togi. Tvinnvélin skilar minna kolefnisspori en áður eða 122 g/km. Hægt er að velja um þrjár mismunandi akstursstillingar, Sport, Normal eða Eco. Viðbragðsþýð aflrásin í HR-V hentar vel við allar aðstæður jafnt í innanbæjarakstri eða á þjóðvegum. Sjálfhlaðandi tvinnvélin skilar umhverfisvænni akstri og dregur úr eldsneytiseyðslu.

Aðgengi er gott og þar leikur nítján sentimetra veghæð bílsins stórt hlutverk. Bíllinn er rúmgóður að innan bæði fyrir fólk og farangur og mun rúmbetri en fyrri gerðir HR-V. Hægt er að leggja aftursætin niður mjög auðveldlega og auka þannig enn frekar á farangursrýmið ef þörf er á. Bíllinn er vel búinn staðalbúnaði og hönnun á innra rýminu er fáguð. Honda HR-V Hybrid kemur með fimm ára ábyrgð og innifalin er regluleg þjónusta í þrjú ár.

Honda HR-V mun kosta frá 5.390.000 kr. og upp í 6.190.000 kr. fyrir dýrustu útgáfuna. Uppgefin eldsneytisnotkun er 5,4 lítrar á hverjum 100 eknum kílómetrum. 

Ný Honda mótorhjól sýnd

Samhliða frumsýningu á HR-V hybrid mun Bílaumboðið Askja sýna ný Honda mótorhjól og hefja með því formlega hjólasumarið 2022 á laugardaginn kl 12-16 í sýningarsal Honda, Krókhálsi 13. Fyrstu Honda mótorhjólin voru flutt inn af Honda umboðinu árið 1969 og hafa skipað stóran sess í hjörtum mótorhjólafólks allt frá upphafi. Honda mótorhjólin eru þekkt fyrir gæði, áreiðanleika, fallega hönnun og fjölbreytt notagildi en ekki síst fyrir þá ánægju sem þau veita notendum.