„Það má segja að við séum sálufélagar í lífi og list“

Rakel er leik- og söngkona hjá Borgarleikhúsinu og hefur nýlega farið með hlutverk Fríðu Hugljúfu í söngleiknum Matthildi og er ungur Bubbi Morthens í söngleiknum Níu Líf. Garðar er gítar- og slagverksleikari og starfar einnig sem hljóðmaður í Borgarleikhúsinu auk þess að hafa samið tónlist fyrir fjölda leiksýninga. 

Vinskapur sem varð að ást

Hljómsveitin varð til eftir að Rakel og Garðar kynntust í leikhúsinu fyrir þremur árum og fóru fljótlega að prófa sig áfram í að skapa tónlist utan vinnunnar. Flæðið á milli þeirra var náttúrulegt og eins og í mörgum góðum ævintýrum varð vinskapurinn að ást. 

„Það má segja að við séum sálufélagar í lífi og list og því lá beint við að stofna hljómsveitina ÞAU.“

Segir Rakel um sambandið. Eftir að hljómsveitin fékk styrk til þess að halda tónleikaröð á Vestfjörðum með góðum vini sínum Ingimari Ingimarssyni vatt verkefnið upp á sig og forvitnin leiddi þau áfram. 

Þau fóru að kynna sér gömul skáld frá Vestfjörðum og úr varð tólf laga efnisskrá með frumsömdum lögum eftir ÞAU við ljóð vestfirskra skálda. Stefna hljómsveitarinnar er í raun blúsuð, rokkuð og ljúf í senn.

Persónulegt líf blandast við listina

Aðspurð hvernig það hafi gengið að búa til plötuna saman segir Rakel það hafa verið krefjandi á tímabili þar sem persónulegt líf þeirra blandast saman við listina. Sjálf sáu þau um upptökur og mix á plötunni er Haffi Tempó sá um að mastera plötuna fyrir þau. 

„Gaman að segja frá því að vinir okkar og samstarfsfélagar úr leikhúsinu, í Níu líf, koma einnig fram á plötunni. Hjörtur Ingvi Jóhannsson spilar á píanó og Aron Steinn Ásbjarnarson á saxafón,“

bætir Rakel við og er augljóst að mikill vinskapur og sköpunarkraftur ríkir hjá leikurunum í Níu líf. 

„Leikhópurinn er þéttur og flæðir um í trausti, en sýningin hefur stórt hjarta sem er ein af ástæðunum fyrir því að hún lifði af 18 mánaða hlé vegna covid,“ segir Rakel sem reynir að tileinka sér hluti sem hún hefur lært í sýningunni bæði af samleikurum sínum og Bubba sjálfum eins og að láta vaða og hætta ekki að leita.

ÞAU taka Bæjarbíó

Í kjölfar útgáfunnar ætla þau að halda tónleika í Bæjarbíó í næsta mánuði þar sem píanóleikarinn Agnar Már Magnússon ætlar að spila með þeim. Tónleikar á Höfuðborgarsvæðinu verða eflaust ekki jafn viðburðaríkir í framkvæmd og tóleikaferðalagið um Vestfirði. Þar gekk ýmislegt á, bílar biluðu og gistingar brugðust.

„Eftirminnilegasta gistingin var án efa þegar við enduðum í gamla hjólhýsinu sem var notað í kvikmyndinni Brúðguminn sem er orðið virkilega gamalt og lúið. Sem var smá svona rokkstjörnu táfýlutúrs augnablik.“