Glódís skoraði og lagði upp í stórsigri Bayern

Glódís var ekki lengi að setja mark sitt á leikinn, en hún lagði upp fyrsta mark leiksins strax á annarri mínútu fyrir Jovönu Damnjanovic.

Klara Buhl tvöfaldaði forystu Bayern rúmum tuttugu mínútum síðar og staðan var því 2-0 þegar flautað var til hálfleiks.

Þriðja mark Bayern skoraði Lina Magull á 70. mínútum síðar og Glódís Perla Viggósdóttir kórónaði flottan leik sinn með því að koma Bayern í 4-0 þegar um tíu mínútur voru til leiksloka, sem urðu svo lokatölur leiksins.

Karólína Lea Vilhjálmsdóttir kom inn af varamannabekknum fyrir Bayern á 74. mínútu, en Cecilía Rán Rúnarsdóttir var ónotaður varamaður.

Bayern situr nú í öðru sæti deildarinnar með 31 stig eftir 13 leiki, aðeins einu stigi á eftir toppliði Wolfsburg. Sand situr hins vegar í næst neðsta sæti með aðeins tvö stig.