Sonur Sigga storms berst fyrir lífi sínu á gjör­­gæslu

„Það kom bakslag í fyrradag en nú er status quo. Þeir segja það læknarnir að þegar svo alvarleg veikindi komi upp gerist batinn í hænufetum. En þetta nagar mann inn að beini. Ég ætla til sálfræðings og við fjölskyldan öll til að ná upp starfsþreki. Við erum ekkert eina fólkið sem hefur lent í þessu en ég er opinn að tala um þetta. Ég á mér þá von og trú að samhugurinn hjálpi. Þess vegna sendi ég þetta út,“ segir Sigurður, betur þekktur sem Siggi stormur, með vísan til ferils hans sem veðurfréttamaður í sjónvarpi.

Siggi birti á jóladag stuttan pistil sem hefur þegar vakið mikla athygli.

Ómetanlegar hlýjar óskir

Siggi segir að ekki hafi staðið á viðbrögðunum, þau hafi verið mikil. Honum hefur verið bent á lækningamiðla og þá er beðið fyrir syni hans og þá er mikið um að fólk biðji fyrir bata Árna Þórðar.

„Hlýja strauma. Það hjálpar í það minnsta foreldrunum svolítið að finna þennan samhug. Það er ómetanlegt og ég kann því fólki miklar þakkir. Nú eru þessir straumar að streyma og kannski förum við að sjá eitthvað gerast. Það tjáðu sig tveir eða þrír prestar á Facebook, sóknarpresturinn hafði samband að fyrra bragði,“ segir Sigurður.

Hann segist búa að sinni barnatrú og þegar á bjátar fari einhverjir slíkir nemar í gang.

„Þegar þetta er svona alvarlegt er svo. Ég hef enga þekkingu til að gera neitt meira en horfa á en ég hef þó þennan möguleika. Einhvern æðri mátt. Það er það eina sem ég get gripið til. Ég vil trúa því að strákurinn komist yfir þetta. Það má aldrei taka frá manni vonina.“

Ekki vitað hvað veldur líffærabiluninni

Sigurður segir lítið um veikindin að segja, einfaldlega vegna þess að það viti enginn hvað raunverulega gerðist.

„Hann hafði haft kviðverki í tvo daga sem hann gerði ekkert í. Svo var hann orðinn viðþolslaus af verkjum, fór í sjúkrabíl á spítala.“

Þá kom fram bilun í líffærum og að sögn Sigurðar vita menn í þrjátíu prósentum tilvika ekki hvað valdi.

„Það er svo margt á huldu í þessu. Sennilega hefur þetta byrjað sem brisbólga. Margir telja að það sé vegna áfengisneyslu en það á ekki við um hann. Læknarnir eru varfærnir í orðalagi.“

Sigurður lýkur upp miklu lofsorði á hjúkrunarfræðinga gjörgæslunnar, þeir séu algjörir meistarar. „Ég á ekki orð yfir hæfni þeirra, manni líður mikið betur á eftir en þær svara á mannamáli. Gjörgæslulæknar frábærir, en þeir akta allt öðru vísi, eru öðru vísi í tali sem er eðlilegt. En hjúkrunarfræðingarnir hafa haldið í manni voninni. Ekki bara íslenskir, þarna eru hjúkrunarfræðingar frá Filippseyjum sem tala íslensku reiprennandi og eru ofboðslega færir.“

Ýmislegt sem gefur von

Sigurður segir son sinn hafa þurft að fara í blóðskiljunarvél til að losna við vökva, í raun hafi flestar þær græjur sem spítalinn hefur yfir að ráða verið notaðar.

„Síðasta sem þeir vilja grípa til er að skera, þá minnka batahorfur. En hann er á sýklalyfjum og er haldið sofandi. Hann er á sterkum verkjalyfjum og mænudeyfður.“

Ekki fer á milli mála að veikindi sonar Sigurðar hafa fengið verulega á hann, sem von er og fjölskylduna alla en þetta ár hefur reynst erfitt. Dauðsföll og veikindi hafa sett sitt mark á árið. „Ætli ég verði því ekki fengnastur þegar þetta hörmungaár verður búið,“ segir Sigurður.

Þau hjónin Sigurður og Hólmfríður eiga þrjá syni. Árni Þórður er í miðjunni, 29 ára gamall, ógiftur og barnlaus. Hann nam við íþróttaskólann á Laugavatni og er útskrifaður tollvörður og starfað sem slíkur í nokkur ár. Sigurður segir að hann sé hraustur, hann hefur aldrei reykt og það hjálpar í þeirri miklu baráttu sem nú stendur yfir. „Og er með sterkt hjarta. Það vinnur ýmislegt með honum,“ segir Sigurður sem vill gjarnan fara að sjá einhvern bata. Fjölskyldan lifir nú í voninni og þiggur góða strauma frá velviljuðu fólki.