Endaði með matar­eitrun á bif­véla­verk­stæði í Qu­eens

Hermann Hreiðarsson er sannkölluð fótboltagoðsögn. Hann spilaði með íslenska karlalandsliðinu í fimmtán ár. Þá er hann sá Íslendingur sem hefur spilað flesta leiki í ensku úrvalsdeildinni en hann spilaði meðal með Crystal Palace, Charlton og Portsmouth. Undanfarin ár hefur hann snúið sér að þjálfun og er um þessar mundir að undirbúa flutninga til Vestmannaeyja þar sem hann hefur tekið við liði ÍBV.

Betri helmingur Hermanns er Alexandra Fanney Jóhannsdóttir. Hún starfaði sem flugfreyja hjá Icelandair en hefur undanfarin ár vera heima með syni þeirra tvo sem þau eignuðust með stuttu millibili.

Þau Hermann og Alexandra voru gestir í 31. þætti af hlaðvarpinu Betri helmingurinn með Ása sem hóf göngu sína síðasta vor. Umsjónarmaður þáttanna er Ásgrímur Geir Logason. Hann fær til sín þjóðþekkta einstaklinga ásamt þeirra betri helming og ræðir um ástarsambandið, lífið og tilveruna.

Kom og þóttist vera að skoða karlanáttföt

Í þættinum segja þau frá því hvernig leiðir þeirra lágu saman í byrjun árs 2017. Hermann var að vinna á skrifstofu Stracta Hotel og Alexandra vann í verslun sem var í sömu byggingu og skrifstofan.

„Ég sá hana þarna í búðinni og ég hugsaði bara: „Vá þetta er bara yfirburðar lang, langfallegasta manneskja sem ég hef nokkurn tímann litið augum“. Þannig ég bara villtist þarna inn öðru hvoru og þóttist vera að skoða karlanáttföt,“ segir Hermann frá.

Alexandra segir að sér hafi vissulega þótt Hermann fjallmyndarlegur. Hún var þó hikandi þar sem hún var viss um að hann væri góður með sig.

Þau höfðu átt stuttar samræður þegar Hermann kom í verslunina og Alexandra hafði sagt vinkonu sinni að henni þætti hann nú svolítið sætur. 

„Síðan bara tekur hann upp símann eitt kvöldið og hringir í mig. Ég hélt að þetta væri símaat en hann var bara: „Nei, nei, þetta er Hermann Hreiðarsson“. Ég fer á já.is og þá var þetta bara hann,“ en Alexandra segir símtalið hafa verið frekar fyndið.

„Hermann segir ekkert alltaf allt sem hann er að hugsa, heldur gerir bara ráð fyrir því að fólk viti restina. Hann tekur bara upp þráðinn þarna eins og við séum búin að eiga nokkur spjöll um það að byrja að hittast. Þetta var svona smá eins og hann ætti bara að vera hringja í vin sinn til þess að ræða þetta.“

Hermann stökk þannig yfir nokkur skref og gerði Alexöndru strax ljóst að honum litist vel á hana en staðan væri vissulega flókin þar sem það væru börn í spilinu. Hermanni tókst þó greinilega að heilla Alexöndru því hún ákvað að bjóða honum í heimsókn.

Óvæntur gestur í New York-ferð

„Þar komst ég nú bara strax að því að við ættum svakalegt sameiginlegt passion og það er matur. Hún eldaði handa mér. Mér finnst mjög gott að borða og þetta var allt vel útilátið þannig ég vissi strax að þarna væri eitthvað spennandi í vændum,“ en Hermann segir Alexöndru vera stórkostlegan kokk.

Þetta kvöld töluðu þau saman fram á rauða nótt og vissu ekki af sér fyrr en klukkan var orðin sjö um morguninn. Þau fundu samstundis fyrir tengingu sem erfitt er að útskýra.

Hermann á tvær unglingsdætur úr fyrra sambandi og Alexandra á einn strák. Þarna tók því við það verkefni að sameina tvær fjölskyldur sem þau segja hafa gengið vel en vissulega krafist tillitsemi.

Eftir að Hermann hafði sagt stelpunum sínum tveimur frá Alexöndru bjó hann til sannkallaða hernaðaráætlun um það hvernig þær skyldu hittast.

„Eldri stelpan mín var að fara út í skóla í Bandaríkjunum og ég ákvað að fylgja henni og taka þá yngri með. Alexandra var þá að fljúga og við fljúgum til New York með Icelandair og ætlum að stoppa eina nótt þar og hafa gaman og halda síðan áfram til Miami.“

Stelpurnar vissu aftur á móti ekki af því að Alexandra væri að fljúga fyrr en Hermann sagði þeim það á leiðinni út á flugvöll. Hún flaug þó ekki út í sömu vél en átti með þeim skemmtilegt stopp í New York.

Endaði inni á klósetti á bifvélaverkstæði í Queens

Þegar kom að heimferð fann Alexandra að henni var farið að líða afar illa. Þau voru á leiðinni upp á flugvöll og hún var orðin kófsveitt.

„Svo finn ég bara að ég þarf að komast út úr bílnum og þá erum við á hraðbrautinni þar sem eru sjö akreinar áfram og sjö í hina áttina. Við erum þarna í miðjunni og það er bara bíll við bíl í allar áttir og ég er bara að leita að einhverjum runna því ég þarf bara að kasta upp.“

Það fór svo að Alexandra og Hermann hlupu inn á bifvélaverkstæði sem þau fundu í miðju Queens hverfi í New York þar sem Alexandra fann klósett.

„Það var eins og klósettið í Fight club. Það var græn flagnandi málning á gólfinu, brotnar flísar, brotið klósett sem var einhvern tíman hvítt en er samt brúnt og bara löng saga stutt, þarna var ryðguð ruslatunna og þar var ég,“ segir Alexandra sem var þarna komin með svæsna matareitrun.

Hermann sat því frammi með bifvélavirkjunum í rúma þrjá klukkutíma eða þar til verkstæðinu var lokað og þau voru rekin út.

„Þetta var bara mjög erfið staða að vera í og með hann með mér. Ég var bara: „Hvað er lífið að reyna gera mér núna?“.“

Heimilið eins og leikskóli

Á þessum tíma var Alexandra ólétt af þeirra fyrsta barni saman, þó svo að það hafi ekki verið ástæða magapestarinnar. Þau eignuðust drenginn Hermann Alex og aðeins ári síðar eignuðust þau annan dreng, Emil Max.

„Svo fluttum við inn í þetta hús sem við vorum að gera upp og tókum þá stefnu að hafa bara eins afslappað og þægilegt umhverfi og við gætum. Þannig að heimilið okkar er bara eins og leikskóli. Það eru engir skrautmunir. Ég er ekki með neitt flott dót, ég er bara með bíla í gluggunum og einhverjar dýnur á gólfinu. Þannig þetta er ekki heimili til að bjóða fólki í mat, en ef þú átt krakka, komdu í heimsókn.“

Í þættinum segja þau frá framkvæmdarferlinu og hvernig það gekk að standa í framkvæmdum með tvö lítil börn og tilheyrandi svefnleysi. En þau segja meðal annars frá því þegar þau ákváðu að leggja sig í bílnum einn morguninn fyrir utan Bauhaus.

Þau Hermann og Alexandra hafa einnig ferðast mikið saman og hafa þau alls komið til átján áfangastaða saman. Þau eiga því margar góðar ferðasögur og segja meðal annars frá því þegar þau sofnuðu á vindsæng úti á sjó á Ítalíu og vöknuðu við þrumur og eldingar.

Í þættinum ræða þau einnig fótboltann, Íslandsdvölina í Covid sem varð að flutningum, búsetuna í Englandi, keppnisskap þeirra beggja og segja bráðfyndna sögu af því hvernig Alexandra hitti tengdapabba sinn í fyrsta sinn við óheppilegar aðstæður.

Hér að neðan má hlusta á viðtalið við þau Hermann og Alexöndru í heild sinni.