Undankeppni HM: Hvað getur gerst í lokaleikjunum?

Í A-riðli er mikil spenna. Þar fer fram hreinn úrslitaleikur klukkan 19:45 að íslenskum tíma þegar að Portúgal og Serbía mætast í Lissabon. Bæði liðin eru með 17 stig í riðlinum en Portúgal er með betra markahlutfall og dugar þess vegna jafntefli. Þetta yrði að öllum líkindum síðasta heimsmeistaramót Cristiano Ronaldo. Það er samt ljóst að Serbar munu selja sig dýrt.

Í B-riðli er næstum nákvæmlega sama staða uppi. Spánn er í efsta sæti riðilsins með 16 stig en Svíþjóð hefur 15 stig í öðru sæti. Þessi lið mætast í Sevilla í þráðbeinni útsendingu á Stöð 2 Sport 2. Svíar þurfa að vinna en Spáni dugar jafntefli.

Í C-riðlinum ráðast úrslitin á mánudaginn. Ítalía og Sviss eru bæði með 15 stig á toppi riðilsins. Ítalía mætir Norður-Írlandi í Belfast en leikurinn er í beinni á Stöð 2 Sport 3. Sviss fær Búlgaríu í heimsókn. Ítalía er með betri markatölu en Sviss en það munar einungis tveimur mörkum. Gríðarleg spenna þar.

Frakkland er búið að vinna D-riðilinn en annað sætið sem gefur rétt á umspili er enn óráðið. Finnar sitja sem stendur í öðru sætinu með tveggja stiga forystu á Úkraínu. Á þriðjudag mætast Frakkland og Finnland annars vegar og Úkraína og Bosnía hinsvegar svo kálið er ekki sopið hjá þeim finnsku.

Í E-riðli hafa Belgar tryggt sér farseðilinn á heimsmeistaramótið en Wales er komið í umspilið vegna góðs árangurs í þjóðardeildinni. Tékkar gætu samt stolið öðru sætinu á þriðjudaginn en þeir fá Eista í heimsókn á meðan Wales spilar við Belgíu í Cardiff. Wales er með 14 stig og fimm mörk í plús en Tékkland 11 stig og þrjú mörk í plús.

Það er engin spenna í F-riðli sem Danir hreinlega slátruðu. Skotar eru í umspilssætinu og ekkert lið ógnar þeim þar. Örlög liða í F-riðli eru því þegar ráðin.

Hollendingar gátu klárað G-riðilinn í dag og voru fimm mínútum frá því. Þeir misstu niður unninn leik í Svartfjallalandi og þess vegna þurfa þeir að ná í stig á móti Noregi í síðasta leiknum. Holland er með 20 stig en Noregur 18. Tyrkir hafa líka 18 stig og því gætu Hollendingar líka misst af umspilinu ef þeir tapa fyrir Noregi og Tyrkland vinnur Svartfjallaland. Þessir leikir eru á þriðjudaginn. Það munar einu marki á Tyrklandi og Noregi í markatölunni og því gæti markamunur leikjanna skipt máli. Leikur Hollands og Noregs er sýndur beint á Stöð 2 Sport 2.

Rússland og Króatía spila hreinan úrslitaleik í H-riðli í dag klukkan 14:00 í beinni útsendingu á Stöð 2 Sport 2. Rússar eru með 22 stig en Króatar 20 og þess vegna dugar Rússum jafntefli í Zagreb.

Í I-riðli eru úrslitin ráðin í rauninni þó svo að tölfræðilegur möguleiki sé enn fyrir hendi fyrir Pólverja að vinna riðilinn. Englendingar hafa þriggja stiga forystu á Pólland í riðlinum en síðasti leikur Englendinga í riðlinum er á móti San Marino á mánudaginn í beinni útsendingu á Stöð 2 Sport 2. England er því svo gott sem búið að vinna riðilinn en Pólland fer í umspil.

Norður-Makedónía tryggir sig í umspil með sigri á Íslandi í dag en Þýskaland er búið að vinna J-riðilinn. Rúmenar geta stolið öðru sætinu ef Norður-Makedónía misstígur sig á móti Íslandi en Rúmenía á leik við Liechtenstein í Vaduz. Rúmenum dugar ekki jafntefli því markatala Norður-Makedóníu er mun betri en þeirra. Rúmenar eru með 14 stig en Norður-Makedónía með 15.