Setti út á val þjálfarans á Instagram en er fyrirliði í Laugardalnum í kvöld

Mkhitaryan er lifandi goðsögn í Armeníu og hefur til að mynda tíu sinnum verið valinn knattspyrnumaður ársins þar í landi.

Þessi 32 ára, sóknarsinnaði miðjumaður skoraði fyrir Roma í ítalska boltanum um liðna helgi. Áður hefur hann spilað með Arsenal, Manchester United og Dortmund, eftir að hafa fyrst vakið athygli hjá Shaktar Donetsk.

Mkhitaryan var ekki með Armeníu í 2-0 sigrinum gegn Íslandi í mars en hann var þá frá keppni vegna meiðsla.

Ekki sannfærandi ástæður

Þjálfarinn Caparrós ákvað svo að velja Mkhitaryan ekki í landsliðshóp sinn vegna vináttulandsleikja í júní. Það fór öfugt ofan í fyrirliðann sem furðaði sig á ákvörðuninni í færslu á Instagram. Þar skrifaði hann:

„Mér til furðu hef ég fengið að vita það hjá þjálfarateymi landsliðs Armeníu að einhverra hluta vegna verði ég ekki valinn í komandi landsleiki. Ástæðurnar sem mér voru gefnar voru ekki sannfærandi. Engu að síður stend ég með strákunum og óska þeim alls hins besta í komandi leikjum.“

Caparrós svaraði færslunni og sagðist einfaldlega hafa viljað prófa nýja leikmenn í vináttulandsleikjunum. Mkhitaryan væri liðinu mikilvægur. Þjálfarinn sagðist hins vegar aldrei koma til með að láta aðra hafa áhrif á leikmannaval sitt.

Í þessum vináttulandsleikjum gerði Armenía 1-1 jafntefli við Króatíu en tapaði 3-1 fyrir Svíþjóð.

Mættir til Íslands eftir mikil vonbrigði í síðustu leikjum

Í september sneri Mkhitaryan aftur í landsliðshóp Armena og lék allar 270 mínúturnar í leikjunum við Norður-Makedóníu, Þýskaland og Liechtenstein. Frammistaða liðsins olli miklum vonbrigðum en Armenía gerði markalaust jafntefli við N-Makedóníu, tapaði 6-0 gegn Þýskalandi og gerði svo 1-1 jafntefli við eitt allra slakasta landslið Evrópu; Liechtenstein.

Nú eru Mkhitaryan og félagar mættir til Íslands og æfðu þeir í kuldanum á Laugardalsvelli í gær. Þrátt fyrir gengið í september er Armenía í 2. sæti J-riðils með 11 stig, sjö stigum á undan Íslandi sem með sigri í kvöld getur haldið í veika von um að enda í 2. sætinu og komast í HM-umspil.