Fá forsetann með sér í lið til að sannfæra Mbappé

Parísarliðið fór mikinn á félagsskiptamarkaðnum í sumar eftir að það horfði á eftir franska meistaratitlinum í hendur Lille síðasta vor, þrátt fyrir að vera með margfalt dýrara lið. Lausn eigendanna frá Katar var að eyða meira og breikka leikmannahóp sem var ekki svo slæmur á pappírum fyrir.

Achraf Hakimi var keyptur fyrir 60 milljónir evra og þá komu Sergio Ramos, Georginio Wijnaldum og hetja Ítala frá EM, Gianluigi Donnarumma, allir á frjálsri sölu. Að ógleymdum Lionel Messi sem PSG stökk á eftir fráhvarf hans frá skuldum vöfnu liði Barcelona.

Höfnuðu heimsmetsboði

Þrátt fyrir þessa miklu útgjaldaaukningu í launakostnaði þurftu stjórnarmenn liðsins ekki að hugsa sig tvisvar um þegar Real Madrid bauð heilar 220 milljónir evra í Kylian Mbappé undir lok félagsskiptagluggans í sumar. Því var hafnað á stundinni. Hefðu kaupin gengið í gegn væri Mbappé dýrasti leikmaður sögunnar, þrátt fyrir að eiga minna en tólf mánuði eftir af samningi sínum í París.

Hugmyndin um að sjá Mbappé á vellinum með bæði Brasilíumanninum Neymar og nýja manninum Messi er einfaldlega of góð til að katarskir eigendur PSG geti sleppt honum frá félaginu. Allt er lagt í sölurnar til að félagið vinni Meistaradeildina í fyrsta skipti í sögu þess í vor, sama ár og Katar heldur heimsmeistaramótið í fótbolta.

Samningaviðræður milli Frakkans og PSG hafa staðið yfir í þónokkurn tíma en virðast vera á ís sem stendur. Því fylgja auknar sögusagnir þess efnis að Mbappé vilji einfaldlega yfirgefa félagið frítt næsta sumar, þremur árum eftir að PSG gerði hann að næst dýrasta leikmanni sögunnar er hann var keyptur á 180 milljónir evra frá Mónakó sumarið 2018.

Allt gert til að halda honum

Stjórnarmenn hjá PSG gera nú allt til að sannfæra Mbappé um áframhaldandi veru í frönsku höfuðborginni. Ekki dugar að bjóða honum ríflega launahækkun heldur segir Marca frá því að Emmanuel Macron, forseti Frakklands, hafi verið fenginn til að hringja í Mbappé og sannfæra hann um að neita tilboðum frá Spáni og halda sig í heimalandinu.

PSG er þá sagt ætla að leggja aukinn kraft í bæta stöðu fátækra barna í París, sem er málefni sem Mbappé hefur beitt sér mikið fyrir, í von um að það ýti undir vilja hans til framlengingar. Miklar fjárhæðir verði lagðar til góðgerðafélags hans, Inspired by KM, sem styrkir börn í um 20 hverfum í París.

Enn fremur hyggst félagið styrkja samband sitt við fjölskyldumeðlimi Mbappé, samband sem hefur orðið stirt síðustu mánuði, auk þess að reyna að fá stuðningsmenn félagsins með sér í lið en þeir blístruðu og bauluðu á Mbappé vegna samningsmálanna í nýlegum leik liðsins í frönsku úrvalsdeildinni.