Chelsea rétt náði að koma Saúl inn fyrir lokun | Allt það helsta á loka­degi gluggans

Spánarmeistarar Atlético Madríd voru með puttana í stærstu félagaskiptum gærdagsins. Miðjumaðurinn Saúl Ñíguez var lánaður til Evrópumeistara Chelsea. Borgar enska félagið fjórar milljónir evra fyrir leikmanninn út leiktíðina. Það getur svo keypt hinn 26 ára gamla Saúl á 35 milljónir evra næsta sumar, þegar lánstíminn rennur út.

Atlético sótti svo franska landsliðsmanninn Antoine Griezmann til Barcelona. Þau félagaskipti komu verulega á óvart þar sem talið var að Griezmann yrði í stóru hlutverki hjá Börsungum eftir brotthvarf Lionel Messi.

Þá eru einnig aðeins tvö ár síðan Atlético seldi leikmanninn til Barcelona fyrir himinháaupphæð. Hann náði þó aldrei að sýna sitt rétta andlit í Katalóní og var í gærkvöldi lánaður til Atlético út tímabilið. Félagið getur svo keypt hann á 40 milljónir evra næsta sumar þegar lánssamningurinn rennur út.

Til að fylla skarð Griezmann ákvað Barcelona að sækja Luuk de Jong. Þessi 31 árs gamli Hollendingur kemur á láni frá Sevilla.

Spænski bakvörðurinn Héctor Bellerín hefur yfirgefið Lundúnir, tímabundið allavega, en Arsenal lánaði kappann til Real Betis út tímabilið. Þessi 26 ára gamli bakvörður hafði ekki komið við sögu hjá Arsenal það sem af er tímabili þrátt fyrir að spila 25 deildarleiki á síðustu leiktíð. Svo virðist sem Betis sé ekki með forkaupsrétt á honum að láninu loknu.

Bellerín er ekki einu hægri bakvörðurinn sem yfirgefur Lundúnir en Tottenham Hotspur rifti samningi Serge Aurier. Þessi 28 ára gamli leikmaður hefur leikið með Tottenham frá árinu 2017 en þar áður lék hann með París Saint-Germain. Hann er nú frjáls ferða sinna og hefur verið orðaður við nýliða Watford.

Í öðrum fréttum þá fór spænski landsliðsmaðurinn Pablo Sarabia til Sporting á láni frá París Saint-Germain. Nuno Mendes fór í hina áttina, það er á láni frá Sporting til PSG. Franska félagið ku borga fjórar milljónir evra fyrir lánið og getur svo keypt hann á 40 milljónir evra næsta sumar.

Patrick Vieira, þjálfari Crystal Palace, sótti landa sinn Odsonne Edouard frá Celtic. Þessi 23 ára gamli framherji hefur raðað inn mörkum með Celtic undanfarin ár og vonast Vieira til að hann geri slíkt hið sama í ensku úrvalsdeildinni.

Að lokum sótti Rafa Benitez Salomón Rondón til Everton. Verður þetta þriðja félagið sem þeir starfa saman hjá. Rondon lékm eð Newcastle United á láni þegar Benitez var stjóri þar. Spánverjinn fékk svo framherjann til Kína þegar hann þjálfaði Dalian þar í landi og nú er hann mættur til Liverpool-borgar.