Messi kostar ekki krónu og leiðir úrvalslið samningslausra

Messi varð samningslaus hjá Barcelona á miðnætti og er í úrvalsliði samningslausra leikmanna sem Sky Sports tók saman.

Messi, sem er orðinn 34 ára gamall, hefur leikið með Barcelona allan sinn feril og meðal annars unnið 10 Spánarmeistaratitla og fjóra Evrópumeistaratitla. Hann er þessa dagana staddur í Brasilíu með argentínska landsliðinu í Ameríkubikarnum.

Þrátt fyrir að hann hafi farið fram á sölu frá Barcelona á síðasta ári virðist vel geta farið svo að hann verði áfram hjá Barcelona og viðræður um nýjan samning þar eru sagðar í gangi. Fari svo að Messi yfirgefi Barcelona þykja PSG og Manchester City líklegust til að landa honum.

Í úrvalsliði samningslausra hjá Sky Sports eru fleiri leikmenn sem eflaust eru mjög eftirsóttir:

Markvörður: Gianluigi Donnarumma. Ítalski landsliðsmarkvörðurinn hefur varið mark AC Milan síðustu fimm ár. Þessi 22 ára gamli leikmaður virðist vera á leið til PSG. Sky nefnir einnig Wayne Hennessey og Willy Caballero sem álitlega kosti á meðal samningslausra markvarða.

Miðverðir: Sergio Ramos ákvað að yfirgefa Real Madrid og Jerome Boateng lauk dvöl sinni hjá Bayern München. Ramos er orðinn 35 ára og var ekki valinn í spænska landsliðið vegna glímu við meiðsli, en ætti að eiga áfram fullt erindi í keppni með einhverju af bestu liðum heims. Boateng, sem er 32 ára, hefur verið orðaður við Monaco, Roma og Tottenham.

Auk þessara tveggja má nefna Davis Luiz, Mamadou Sakho, Gary Cahill, Scott Dann og Nikola Maksimovic.

Bakverðir: Hægri bakvörðurinn Elseid Hysaj hefur spilað 179 leiki fyrir Napoli í efstu deild á Ítalíu og 59 landsleiki fyrir Albaníu. Ezgjan Alioski, sem lék síðast með Leeds, vakti athygli með landsliði Norður-Makedóníu á EM og er líkt og Hysaj á besta fótboltaaldri.

Sky Sports bendir á að Ryan Bertrand, Patrick van Aanholt, Nathaniel Clyne, Branislav Ivanovic, Adam Smith, Ahmed Elmohamady, Martin Kelly og Joel Ward séu einnig samningslausir.

Miðjumenn: Spánverjinn Juan Mata vill halda áfram hjá Manchester United en þessi 33 ára gamli leikmaður er orðinn samningslaus. John Lundstram, sem lék með Sheffield United, og Jeffrey Schlupp sem staðið hefur sig vel með Crystal Palace í ensku úrvalsdeildinni, eru einnig samningslausir. Það á einnig við um menn á borð við Jack Wilshere, Robbie Brady, Adam Reach og James McCarthy.

Sóknarmenn: Auk besta leikmanns sögunnar, að margra mati, eru nokkrir stórgóðir sóknarmenn á lausu. Normaðurinn Joshua King, sem lék svo vel hjá Bournemouth en fékk fá tækifæri hjá Everton, og Stevan Jovetic, landsliðsmaður Svartfjallalands og fyrrverandi leikmaður Manchester City, eru til að mynda samningslausir.

Það sama má segja um Santos Borre, Dwight Gayle, Troy Deeney, Kevin Gameiro, Andy Carroll, Connor Wickham, Hal Robson-Kanu, Andros Townsend, Robin Quaison, Marcos Paulo, Jacob Murphy, Andre Ayew, Jose Izquierdo, Christian Atsu og Junior Stanislas.