Storytel gefur út nýja skáldsögu Óskars

„Ég er fullur eftirvæntingar með þessi fyrstu skref mín í samstarfi með Storytel sem hafa verið frábær og langt umfram væntingar, enda finnur maður fyrir krafti og eldmóð hjá starfsfólkinu. Dansandi ferskir og spennandi tímar framundan!,” segir Óskar Guðmundsson, rithöfundur en Storytel mun í haust gefa út nýja bók hans, Dansarann, undir merkjum Storytel Original.

Dansarinn gerist árið 1982 og fjallar um tvítugan dreng sem elst upp hjá einstæðri móður sem hafði verið framúrskarandi góður ballettdansari, en brostnir draumar, höfnun og áföll keyra veröld hennar um koll. Hún elur son sinn upp af miklu harðræði í hálfgerðri einangrun og er haldin þeirri þráhyggju að sonur hennar verði besti ballettdansari sem um getur. Heimur hans hverfist um móðurina og dansinn með skelfilegum afleiðingum.

Óskar er í fremstu röð íslenskra glæpasagnahöfunda en fyrsta bók hans, Hilma hlaut Blóðdropann, íslensku glæpasagnaverðlaunin, sem besta glæpasagan árið 2015. Önnur skáldsaga Óskars, Blóðengill sem er sjálfstætt framhald af Hilmu, kom út árið 2018 og þriðja bók hans, Boðorðin kom út árið 2019. Allar bækurnar eru aðgengilegar á Storytel.

Bókaútgáfan Storytel Original gefur út frumsamdar sögur sem höfundar skrifa beint fyrir hljóðbókaformið (audio first) og því er mikil áhersla lögð á gæði hljóðbókarinnar.

„Það hefur verið frábært að vinna með Óskari að sögunni hans, enda kemur hann að borðinu svo fullur af hugmyndum og sköpunargleði. Við hlökkum mikið til áframhaldandi samstarfs og þess að geta svo miðlað bókinni hans til landsmanna í haust,” segir Elísabet Hafsteinsdóttir, útgáfustjóri Storytel.