Ís­land styrkir hlut­falls­lega mest

Óttarr Proppé, bóksali, tónlistarmaður og fyrrverandi heilbrigðisráðherra hefur setið í stjórn UNICEF frá árinu 2019 og tekur við formannssætinu af Kjartani Erni Ólafssyni.

„Það er mikill heiður að vera treyst fyrir þessu hlutverki og að fá tækifæri til að leggja mitt á vogarskálarnar í þágu barna heimsins,“ segir Óttarr. Hann segir það hafa verið ánægjulegt að fylgjast með Íslendingum sýna stuðning sinn í verki til að hjálpa börnum um allan heim.

Þrír nýir meðlimir tóku sæti í stjórninni í gær, þau Edda Hermannsdóttir, samskiptastjóri Íslandsbanka, Hjörleifur Pálsson, stjórnarformaður Háskólans í Reykjavík og Sýnar og Jón Magnús Kristjánsson, framkvæmdarstjóri Heilsuverndar. Þau Sigríður Thorlacius, Kjartan Örn Ólafsson, Guðrún Nordal, Jökull Ingi Þorvaldsson og Guðrún Hálfdánardóttir munu sitja áfram í stjórninni.

Öflugt innanlandsstarf í þágu barna

Á ársfundinum var farið yfir tekjur UNICEF á Íslandi í fyrra, en þær námu tæpum 800 milljónum króna. Þá koma hlutfallslega hæst framlög til baráttu UNICEF frá Íslandi, mest í gegnum stuðning Heimsforeldra. 

UNICEF brást við ákalli stjórnvalda við upphaf heimsfaraldurs og tók þátt í að kanna stöðu viðkvæmra hópa barna. Áhersla var lögð á stöðu barna sem upplifa ofbeldi á heimilum sínum, börn sem sækja um alþjóðlega vernd og ungmenni í viðkvæmri stöðu.

Þá mótmælti Ungmennaráð UNICEF brottvísun barna með því að leggja einn bangsa fyrir framan nefndasvið Alþingis, fyrir hvert barn sem vísað var úr landi og neitað um alþjóðlega vernd hér á landi árið 2019.

Neyð barna jókst í faraldrinum

„Árið 2020 var engu líkt og neyð barna í heiminum jókst til muna vegna áhrifa Kórónuveirunnar. Meira en 1,5 milljarður barna varð fyrir áhrifum skólalokanna, 80 milljónir barna undir eins árs aldri fóru á mis við reglubundnar bólusetningar og efnahagsþrengingar og aukin fátækt í heimila jók á hungur barna,“ segir Birna Þórarinsdóttir, framkvæmdarstjóri.

Hún segir það verða kapphlaup næstu ára að koma í veg fyrir að afleiðingar Kórónuveirunnar verði ekki áratuga bakslag í réttindum og velferð barna.