„Við getum gert betur í að jafna hlut kynjanna“

„Þjóðhátíðarnefnd einsetur sér að ráða til verksins hvern þann aðila sem við teljum líklegastan il að semja fyrir okkur lag sem fangað geti stemninguna á Þjóðhátíð, náð vinsældum og uppfyllt önnur þau skilyrði sem Þjóðhátíðarnefnd setur, óháð kyni,“ segir Hörður Orri Grettisson, formaður Þjóðhátíðarnefndar og framkvæmdastjóri Íþróttabandalags Vestmannaeyja.

„Þjóðhátíðarnefnd vinnur stöðugt að því að bæta hátíðina á öllum sviðum ár frá ári og þegar við fáum réttmæta gagnrýni á okkar störf eða sjáum eitthvað sem betur má fara þá að sjálfsögðu tökum við það upp, skoðum og reynum að gera betur. Við getum gert betur í að jafna hlut kynjanna og ætlum að bæta okkur í því í framtíðinni,“ segir Hörður.

Miðasala fyrir Þjóðhátíð hefur aldrei farið betur af stað

Þjóðhátíð í Eyjum verður haldin með pompi og prakt um komandi Verslunarmannahelgi en þjóðhátíðarþyrstir Íslendingar hafa þurft að bíða í tvö ár eftir að komast í Herjólfsdal til að skemmta sér. Það er því kannski ekki óvænt að miðasala á hátíðina hefur aldrei farið betur af stað.

„Fljótlega varð fullt í þær ferðir sem eru hvað vinsælastar, til Eyja á föstudegi og frá Eyjum á mánudegi,“ segir Hörður.

Hann segir að á einhverjum tímapunkti gæti þurft að stöðva söluna svo að upplifun gesta verði sem best.

„Ef of margir miðar verða seldir þá erum við hrædd um að upplifunin verði ekki sú sama.“

Mikil tilhlökkun hjá Eyjamönnum

Heimasíður Herjólfs og Þjóðhátíðar lágu niðri um tíma á miðvikudag. Hörður segir að mikil traffík hafi verið um síðurnar.

„Báðar síðurnar lágu niðri um tíma vegna álags. Hýsingaraðilar okkar vanmátu álagið og þá eftirspurn sem myndaðist sem er auðvitað miður og því fór sem fór. Miðasalan á báðum stöðum gekk þó vel eftir þessa hnökra,“ segir Hörður.

Töluverður fjöldi þeirra sem hafði tryggt sér miða fyrir Þjóðhátíð 2020, sem ekki var haldin, hafa nýtt sér það úrræði að nota miðann sinn í ár. Flestir sem höfðu keypt miða óskuðu þó eftir endurgreiðslu.

„Töluverður fjöldi flutti miðann sinn yfir á hátíðina í ár og njóta þau góðs af því enda var það líka ljóst í júlí í fyrra að miðaverð á Þjóðhátíð í ár myndi hækka í ljósi þess að hátíðin féll niður í fyrra,“ segir Hörður.

Hann segir að mikil tilhlökkun sé meðal Eyjamanna fyrir hátíðinni.

„Já það er mikill spenningur hjá ÍBV að framkvæma hátíðina og við upplifum mikla tilhlökkun hjá fólkinu í Eyjum yfir því að mæta á Þjóðhátíð og miða við hvernig miðasalan fór af stað er ekki heldur hægt að segja neitt annað en að allir landsmenn séu spenntir fyrir því að mæta á Þjóðhátíð.“