Lilja Alfreðsdóttir: „Þetta er mér mikið hjartansmál“

„Ráðherra íþróttamála er virkilega ánægður með fréttir dagsins,“ sagði Lilja í samtali við Vísi fyrr í dag. „Við erum búin að vinna hörðum höndum að þessu með íþróttahreyfingunni og mér finnst það mjög gott að það sé verið að opna á þetta.“

„Mér hefur fundist það mikilvægt að það sé sambærileg staða fyrir íþróttafólkið okkar hér heima og í löndunum í kringum okkur.“

Lilja segir að þó að sé búið að opna á æfingar og keppni í íþróttum þurfi að huga vel að heilsu íþróttafólks og allra í kringum þær.

„Við höfum unnið hörðum höndum að þessu með íþróttahreyfingunni, en auðvitað þarf að tryggja heilsu og velferð allra. Aðstæður eru sem betur fer að batna vegna þess hversu vel hefur gengið að bólusetja.“

Fyrst um sinn voru áhorfendur ekki leyfðir, en þeirri ákvörðun þó breytt þegar líða tók á daginn. Nú hefur verið staðfest að 100 manns megi mæta á íþróttaviðburði, að uppfylltum skilyrðum. En hvað breyttist?

„Það sem var verið að gera var að það er verið að samræma á milli íþrótta og sviðslista. Í sviðslistum var heimilt að hafa áhorfendur að uppfylltum ákveðnum skilyrðum og ég hef lagt mikla áherslu á að þetta verði samræmt. Það er mikið fagnaðarefni að það hafi náðst í gegn.“

Einhverjir hafa velt því fyrir sér hvort og þá hvenær næsta bann skelli á.

„Það þarf að fara vel með stöðuna eins og hún er núna. Það að fólk sé að velta því fyrir sér, segir okkur hvað íþróttir skipta miklu máli.“

„Ég tel að þau samfélög sem ná að tryggja sem mesta virkni komist fyrst út úr þessu. Þar tel ég að íþróttir og hreyfing spili stóra rullu. Ég hef gríðarlega trú á íþróttum og hreyfingu almennt og þetta er geðheilbrigðismál.“

Umfangsmiklar aðgerðir hafa verið síðustu misseri til að bæta íþróttafélögum fjárhagslegan skaða sem hlotist hefur af þessum stoppum sem orðið hafa. En eru einhverjar áætlanir varðandi það að bæta þeim þann skaða sem af því hlýst að mikið brottfall verði frá íþróttafélögunum?

„Þetta er mér mikið hjartansmál,“ sagði Lilja. „Hvort sem verið er að ræða um brottfall úr íþróttum eða skólum er mjög stórt mál.“

„Ég óskaði eftir því í upphafi faraldursins að félögin héldu utan um alla tölfræði hvað varðar brottfall og annað svo að við gætum aðstoðað þau. Hugsunin með þessum styrkjum var og er að halda félögunum gangandi, en við eigum eftir að sjá hvernig landið liggur og þetta er eitthvað sem má alls ekki gerast.“

Lilja er bjartsýn á að ástandið og faraldurinn sem að við erum að ganga í gegnum eigi bara eftir að styrkja íþróttastarf á landinu.

„Markmiðið er að það verði fleiri sem stunda íþróttir og aðrar tómstundir nú þegar þessum faraldri líkur heldur en þegar hann fór af stað.“