Sjáðu mörkin sem settu allt í uppnám í titilbaráttunni á Spáni

Atlético hefur kastað frá sér öruggu forskoti á toppi deildarinnar og er aðeins stigi á undan Real Madrid, eftir 1-1 jafntefli við Real Betis í gær. Yannick Carrasco kom Atlético yfir en Tello jafnaði metin á 20. mínútu. Mörkin úr leiknum má sjá hér að neðan.

Real komst á toppinn í stutta stund með 2-1 sigrinum gegn Barcelona sem er tveimur stigum frá toppnum. Karim Benzema og Toni Kroos skoruðu mörk Real en Óscar Mingueza minnkaði muninn.

Nú þegar liðin eiga átta leiki eftir hvert horfa margir til leiksins á milli Barcelona og Atlético á Camp Nou laugardaginn 8. maí. Sá leikur gæti ráðið miklu í titilbaráttunni.

Real Madrid þarf einnig að huga að Meistaradeild Evrópu en þar er liðið í ágætri stöðu gegn Liverpool eftir 3-1 sigur í fyrri leik liðanna. Liðin mætast á Englandi á miðvikudagskvöld.

Börsungar eiga einnig möguleika á tveimur titlum á þessari leiktíð. Þeir leika úrslitaleik spænska bikarsins gegn Athletic Bilbao á laugardaginn.