Hver á að taka við kvennalandsliðinu?

Næstu dagar og vikur verða annasamar fyrir Guðna Bergsson, formann KSÍ, en hann þarf að finna nýja þjálfara fyrir bæði karla- og kvennalandslið Íslands í fótbolta.

Starf þjálfara kvennalandsliðsins losnaði í gær eftir að Jón Þór Hauksson hætti vegna uppákomu eftir leik Íslands og Ungverjalands á þriðjudaginn í síðustu viku.

Ekki liggur fyrir hvenær næstu leikir kvennalandsliðsins eru. Undankeppni HM 2023 hefst væntanlega á næsta ári og svo er Evrópumótið í Englandi sumarið 2022.

Hér fyrir neðan má sjá nokkra kosti í stöðu þjálfara kvennalandsliðsins.

Elísabet Gunnarsdóttir

Ætti að vera fyrsti, annar og þriðji kostur í starfið og sú sem Guðni ætti að hringja fyrst í. Gríðarlega fær þjálfari sem hefur stýrt Kristianstad í Svíþjóð síðan 2009. Síðasta tímabil var það besta í sögu félagsins. Það endaði í 3. sæti sænsku úrvalsdeildarinnar og vann sér sæti í Meistaradeild Evrópu. Elísabet var valinn þjálfari ársins og fékk heiðursverðlaun á uppskeruhátíð sænsku deildarinnar.

Elísabet hefur gefið í skyn að hún sé tilbúin að prófa sig á nýjum vettvangi eftir að hafa verið lengi á sama stað en það er eflaust erfitt að sleppa takinu af Kristianstad þegar spennandi tímabil er framundan. Þá hefur Elísabet allavega einu sinni hafnað því að taka við kvennalandsliðinu.

Þorsteinn Halldórsson

Hinn augljósi kosturinn í stöðunni. Þorsteinn hefur stýrt Breiðabliki undanfarin sex ár með frábærum árangri. Hefur gert Blika þrisvar sinnum að Íslandsmeisturum og tvisvar sinnum að bikarmeisturum. Þorsteinn hefur þjálfað marga leikmenn í landsliðinu hjá Breiðabliki, þ.á.m. hinar ungu Sveindísi Jane Jónsdóttur, Karólínu Leu Vilhjálmsdóttur og Alexöndru Jóhannsdóttur sem verða í stórum hlutverkum í íslenska liðinu á næstu árum.

Þorsteinn var sterklega orðaður við landsliðsþjálfarastarfið fyrir tveimur árum en viðræðurnar við KSÍ voru heldur snubbóttar að hans sögn.

Ian Jeffs

Hefur verið aðstoðarþjálfari landsliðsins undanfarin tvö ár. Var þar áður þjálfari kvennaliðs ÍBV og gerði það m.a. að bikarmeisturum 2017. Jeffs væri þó kannski „óþægileg“ ráðning í ljósi þess að hann var aðstoðarmaður Jóns Þórs.

Davíð Snorri Jónasson

Er þjálfari U-17 árs landsliðs karla og kom því á lokamót Evrópumótsins. Hefur verið njósnari fyrir karla- og kvennalandsliðið. Fékk tækifæri til að stýra karlalandsliðinu gegn Belgíu ásamt Arnari Þór Viðarssyni þegar þjálfarar liðsins voru í sóttkví. Efnilegur þjálfari sem virðist vera í miklum metum innan KSÍ.

Kristján Guðmundsson

Hefur þjálfað kvennalið Stjörnunnar undanfarin tvö ár og gert fína hluti á umbrotaskeiði hjá liðinu. Gríðarlega reyndur þjálfari sem hefur gert góða hluti á langflestum stöðum sem hann hefur verið á.

Freyr Alexandersson

Stýrði kvennalandsliðinu á árunum 2013-18 og kom því á EM 2017. Í miklum metum hjá leikmönnum landsliðsins. Var aðstoðarþjálfari Eriks Hamrén með karlandsliðsins en sagði á dögunum að tíma hans hjá KSÍ væri líklega lokið í bili. Er núna aðstoðarþjálfari Heimis Hallgrímssonar hjá Al Arabi í Katar. Fáum við óvænta endurkomu Freys í stól þjálfara kvennalandsliðsins?

Pétur Pétursson

Hefur gert flotta hluti með Val og endaði langa bið liðsins eftir Íslandsmeistaratitli í fyrra. Afar reyndur þjálfari. Var aðstoðarmaður Ólafs Jóhannessonar með karlalandsliðið á árunum 2007-11.