Víðir nýtur fyllsta trausts Katrínar og Svandísar

Katrín sagði í viðtali við Sunnu Karen Sigurþórsdóttur í beinni útsendingu frá Ráðherrabústaðnum í hádeginu að Víðir nyti trausts hennar. 

„Hann nýtur míns trausts,“ segir Katrín. Við séum öll að fóta okkur í flóknum aðstæðum og Víðir hafi komið heiðarlega fram. Við séum öll á þeim stað

„Sjálf bý ég í fjölbýlishúsi svo dæmi sé tekið. Ég hitti fólk sem er ekki í mínum nánasta hring og er í því sem hefur verið skilgreint sem hááhættusvæði, sem eru svona sameiginleg rými. Við reynum öll að gera okkar besta í þeim aðstæðum sem við erum í,“ segir Katrín.

Miklu skipti að koma heiðarlega fram eins og Víðir hafi gert.

Rætt er við Katrínu hér að neðan.

Svandís Svavarsdóttir heilbrigðisráðherra er á sama máli.

„Að sjálfsögðu nýtur Víðir Reynisson míns trausts. Hans skilaboð til samfélagsins hafa verið mjög mikilvæg í marga marga mánuði,“ segir Svandís.

Ekki í embætti til að meta hegðun einstaklinga

Þríeykið, skipað þeim Víði, Þórólfi Guðnasyni sóttvarnalækni og Ölmu Möller landlækni, sé kannski stærsta ástæða þess hve góður árangur hefur náðst hér á landi í baráttunni við veiruna samanborið við nágrannalöndin.

„Ég ætla ekki að tjá mig um einstaka atburði í lífi fólks. Hann hefur sjálfur gert það og það dugar,“ segir Svandís. 

„Ég er ekki í þessu embætti til að vega og meta hegðun einstaklinga.“

Rætt er við Svandísi hér að neðan.

Eðlilegt sé að samfélagið ræði öll þessi mál og það sé eðlilegt. Fólk þurfi að nálgast Covid-19 faraldurinn af væntumþykju, bæði gagnvart samfélaginu og hvert öðru. 

Sameiginlegir snertifletir líklega smitleiðin

Víðir hefur verið í sóttkví í viku eftir að hafa smitast af eiginkonu sinni en uppruni smitsins er óþekktur. Helgina fyrir greiningu voru þau hjónin að mestu heima við, en þó komu nokkrir gestir í heimsókn. Vinafólk þeirra bjó hjá þeim tímabundið vegna þess að þau þurftu til læknis í Reykjavík og kíktu dætur þeirra í kaffi á sunnudeginum ásamt vinkonu þeirra.

„Börn okkar, tengdadóttir og barnabarn komu einnig við og um kvöldið komu til okkar vinahjón sem stoppuðu stutt. Í öllum tilfellum var passað upp á fjarlægðir á milli okkar og gesta og reyndum að forðast sameiginlega snertifleti,“ skrifar Víðir, sem segir það ekki hafa dugað til.

„Við erum búin að fara vel yfir öll samskiptin og höfum fundið að fjarlægð sem var haldin var um eða yfir 2 metra við alla. Hins vegar er ljóst að við pössuðum ekki upp á alla sameiginlega snertifleti. Vatnskanna, kaffibollar og glös hafa sennilega verið sameiginlegir snertifletir sem hafa dugað til að smita.“

Enginn biðji fólk um að sitja lokað inni

Batakveðjum hefur rignt yfir Víði í kjölfar frásagnar hans. Rögnvaldur Ólafsson aðstoðaryfirlögregluþjónn og Þórólfur Guðnason sóttvarnalæknir líta ekki svo á að Víðir hafi farið gegn eigin ráðum og þeirra.

Aðspurður hvort það væri hins vegar æskilegt fá tólf manns í heimsókn á 48 klukkutímum, þótt allir væru ekki að koma á sama tíma, svaraði Þórólfur neitandi en benti á að fólk þyrfti til dæmis að sinna fjölskyldunni sinni.

„Þetta eru náttúrulega oft fjölskyldumeðlimir og fólk á foreldra og fólk á börn og auðvitað þarf fólk að hafa samskipti við sitt fólk eftir sem áður. Það er enginn að biðja fólk um að sitja lokað inni og hafa ekki samskipti við nokkurn mann. Fólk þarf að fara út í búð og fólk þarf að gera ýmsa hluti, fólk þarf að sinna börnunum sínum og foreldrum og svo framvegis. Þar eru kontaktarnir þannig að þeir eru ansi margir þrátt fyrir allt en við erum að biðla til fólks að fara bara mjög varlega. Ef allir fara varlega þá lágmörkum við þessa áhættu, við höfum aldrei sagt að það sé hægt að uppræta hana algjörlega,“ sagði Þórólfur í Bítinu á Bylgjunni í gær.